Timor-Leste (TL)
hanesan nasaun ida ne’ebe mos sai membru ba nasoens Organizasaun Mundial Saúde
(OMS) iha rejiaun Azia Sudestiku. Iha rejiaun ida ne’e TL sei enfrenta hela problema saúde liu-liu moras kontajiozas barak hanesan TBC,
Malaria, HIV/SIDA no mos moras tropikal abandonadu ka Neglected Tropical Diseases (NTDs) hanesan limfatik filariasis
(LF), infesaun lumbriga ka Soil
Transmitted Helminthes (STH) no Framboezia (Yaws).
Iha tinan 2012, MS halao peskiza
nasional ida kona-ba prevalensia nasional moras LF no STH ho koperasaun
Universidade Sydney (The University of
Sydney) no suporta finanseiru no tekniku husi OMS. Rezultadu peskiza ne’e
deskobre katak Sero-prevalensia nasional ba moras LF iha TL iha 17,5% no STH ba
labarik idade eskola iha 29.0%. Dadus ida ne’e hatudu katak TL nasaun ida
ne’ebe endemiku ba moras LF, tamba tuir padraun OMS katak prevalensia LF tenke
< 1% husi total populasaun rai refere no ba kontekstu Timor-Leste Munisipiu
ida –idak tenke atinji prevalensia LF < 1% ida ne’e.
Programa Mass
Drug Administration (MDA) ka distribuisaun aimoruk masal ba
ema hotu ida ne’e atu responde ba moras LF no infesaun lumbriga (STH) ne’ebe
mak endemiku iha Timor-Leste. Ho ida ne’e, Governo RDTL iha komitmentu atu
halao programa ida ne’e husi tinan 2015-2020.
Objetivu hala’o programa MDA atu hamenus taxa lumbriga oan
(microfilaraemia rate) ba LF husi 10,6 %
to’o menus husi 1% ba populasaun iha Timor-Leste iha tinan 2020, prevene no
kontrola disabilidade kauza husi LF liu husi jestaun morbilidade ±80% ba hirak
ne’ebe identifika ho disabilidade tamba LF iha 2020, kontrola infesaun
ne’ebe kauza husi lumbriga ka STH husi
29% to’o 5 % ba labarik sira ho idade husi fulan 6 to’o tinan 16 liu husi tratamentu lumbriga dala rua ba kada tinan
iha 2020, Elimina
Framboezia, i kazu zero liu husi identifikasaun kazu ativu no tratamentu ba
kazu hotu-hotu ne’ebe identifika, sira nia kontaktus no populasaun ne’ebe iha
risku (e.z. ema hotu hotu iha suco laran bainhira kazu ruma deteta) iha 2017 no
atinji eradikasaun iha 2020.
Paulino Pinto nudar consultan ba programa MDA ne’e informa katak atividades
planeadu ba programa MDA kompleta ona mak hanesan advokasia lider lokal iha nivel
munisipiu sobre programa MDA, kona halao vijilansia baze de dadus, treinamentu
facilitadores programa MDA iha munisipi, treinamentu voluntariu komunidade iha
nivel posto administrativu, registrasaun komunidade no alunus escola husi
voluntariu komunidade, fahe aimoruk massal husi voluntariu komunidade, ikus liu
monitorizasaun ba reasaun adversa aimoruk husi voluntariu komunidade.
Paulino realsa programa MDA durante tinan 2015 no
Kuarter 2 tinan 2016 halao ona iha Munisipiu 10 hanesan Liquisa, Ermera, Manatutu,
Aileu, Ainaro, Manufahi, Baucau, Viqueque, Lautem, no Dili. Munisipiu tolu
hanesan Liquisa, Ermera no Manatutu kompleta Ronde 1 iha fulan outobru no
Novembru 2015. Tamba iha reasaun adversa ne’ebe mosu maka’as iha Munisipiu
Bobonaro iha tempu ne’eba iha fulan Outobru 2015, programa MDA mos hapara
temporariamente husi Ministra
Saúde.
Conltan ba programa MDA haktuir planu
Ministériu
Saúde liu husi Departementu
Doencas Contajiozas sei halao fila fali
programa MDA iha Covalima, Bobonaro no Oecusee iha semana segundu fulan Maiu
iha 2016. Orsamentu alokadu ona ba Munisipiu hirak ne’e. Ba Rejiaun
ZEEMS-Oé-Cusse (Ambéno), no Munisipiu Bobonaro komesa ona advokasia ba lider
lokal sira no treinamentu ba pesoal saude sira atu sai fasilitadores ba
prgorama MDA nian ba tinan 2015-2020. Hafoin treinadu ba MDA, fasilitadores
sira ne’e sei treinadu fila fali atu implementa programa MDA hodi fahe aimoruk
DEC, Albendazole no Pyrantel Pamoate ba populasaun ne’ebe mak elijivel atu
hemu. Tamba, ba sira ne’e mak hanesan inan
isin rua, inan fo-susu no moras todan hanesan kankru, moras fuan, moras rins
sei exkluidu (la fo aimoruk) ne’ebe mak mensiona iha leten.
Voluntariu
sira ne’ebe treinadu ona no sei treinu sei ba halao rejistu uma kain, fahe aimoruk – DEC, Albendazole no Pyrante Pamoate,
no mos sei identifika populasaun hirak ne’ebe mak suspeitu moras TBC, Malaria
no Ain-potis hodi bele hetan verafikasaun no konfirmasaun husi fasilitadores
MDA nivel Munisipiu sira. Tamba, programa MDA ne’e Programa integradu ho
program sira seluk ne’ebe mak halao program hirak ne’ebe mensiona-TBC, Malaria
no seluk tan. Husi programa fahe aimoruk masal ida ne’e, voluntariu komunidade
sira mos treinadu atu bele suspeitu moras Frambuezia no sei koileta informasaun
kona-ba moras refere hodi bele fo informasaun ba pesoal saude hanesan tekniku
laboratoriu nivel Munisipiu sira atu bele hasai ran hodi bele halo testu ba
moras refere. Tamba, Ministério Saúde mos iha objetivu atu elimina moras ida
ne’e iha tinan 2020. Paulino
reforsa.MS-001
No comments:
Post a Comment