Wednesday, September 19, 2012

Ministro Saude, Dr. Sergio Lobo, Segunda feira, iha 17 de Setembro de 2012 halo enkontru ho Konselhu Diresaun Ministeriu Saude.

Enkontru Konselhu Diresaun ne’e hanesan ekontru rutina ne’ebe halo iha sala ekontru MdS ne’e koalia konaba projektu banku mundial nian HSSP-SP no NHSSP-SP ne’e hahu efikas iha fulan Junhu, tinan 2008.

Reprezentante Banku Mundial, Lourenco Kamnahas hateten, objetivu kooperasaun Banku Mundial ho Ministeriu Saude iha Projektu HSSP-SP ne’e, atu melhora kualidade no kobertura servisus preventiva saude, espesialmente inan no labarik sira atu progresus ba Metas Dezenvolvimentu Mileneu ne’e, fokus iha komponente ha’at (4).

- Prestasaun Servisu Saude
- Servisu apoiu, Rekursus Humanus no Jestaun.
- Koordenasaun planejamentu
- Invazaun no dezenvolvimentu programa.
Objektivu implementasaun projektu NHSSP-SP, apoia Governu Timor Leste liu husi Ministeriu Saude atu hetan rekursusne’ebe presija atu hadiak prestasaun servisu Saude iha Distritu no Sub-Distritu ne’e focus ba komponente tolu (3) ;
- Hadiak jestaun finanseira publica, no fluxu ba prestasaun servisu.
- Fortalesimentu suprimentos medikusno farmaseutikus.
- Hadia no evidensia informada atu halo desizaun no koordenasaun iha sector saude.

Objetivu misaun, halo follow-up ba aktividade implementasaun no progresus HSSP-SP. Fornese treinamentu sobre prosedimentu Banku no jestaun fidusiaria. Finaliza arranjamentus final ba implementasaun projektus nian. No Misaun ne’e sei fo atensaun espesial ba progresu implementasaun planus ne’ebe rekomenda ona iha Aide Memoire husi ultimu misaun iha fulan Fevereiru 2012 no relatoriu progresu projektu Governu 2012. Halo revizaun ba modalidade institusionais no implementasaun, planu detail ba implementasaun no suporta atu hadiak estatus implementasaun projektu.

Xefi Aprovizionamentu hateten, projektu HSSP-SP ne’ebe hetan apoiu husi Banku Mundial no parseirus seluk, hanesan ita hare’e durante ne’e wainhira planu ne’e implementa presija ita hotu nian apoiu husi departementu relevante, depois reestruturasaun ejekusaun labele hetan difikuldade.

Iha realidade, ne’ebe servisu wainhira hetan orsamentu ne’ebe alokadu iha aktividades, ita hare’e dala barak wainhira laiha envolvimentu diretamente husi departementu relevante, divizaun relevante implementasaun ne’e hetan difikuldade. Tanba ne’e, wainhira tau iha planu no Banku Mundial fo apoiu, labele hanoin katak orsamentu ne’e Banku Mundial nian, maibe orsamentu ne’e Banku Mundial apoia ba Ministeriu Saude, para atu fo apoiu ba aktividades ne’ebe Ministeriu Saude liu husi Equipa servisu atu hala’o no implementa.

Ministru Saude, Dr. Sergio Lobo hateten, ekipa Ministeriu Saude nian ne’e maka presiza atu  hare’e planu husi orsamentu jeral estadu nian ho orsamentu husi doadores nian atu buat ne’ebe atu produz orsamentu jeral estadu labele repetida fali iha orsamentu ne’ebe alokadus.

Parte ne’e importante tebes, tanba dala ruma dehan orsamentu ne’e Banku Mundial nian ne’e la-los. Orsamentu ne’e Banku Mundial fo apoiu ba Ministeriu Saude, signifika katak orsamentu ne’e Ministeriu Saude nian, presiza ita fo apoiu tomak ba  implementasaun para labele hetan difikuldade.

Reprezentante Banku Mundial, Lourenco Kamnahas hateten, periudu implementasaun programa HSSP-SP, iha fulan Junhu 2008 hetan apoiu husi AusAID, USD 20 milhão no husi IDA, USD 1 milhão.

Implementasaun programa NHSSP-SP iha fulan Junhu 2013 hetan apoiu orsamentu husi AusAID no União Europeia, USD 21,4 milhão. No, iha Junho 2013 NHSSP-SP hetan apoiu orsamentu husi AusAID no União Europeia, USD 17,8 milhão. MoH

Ministru Saude, Dr. Sergio Lobo "Makina Operasaun Iha HNGV Sei Diak".


Thursday, September 13, 2012

Press Release


 Ministru Saude, Dr. Sergio Lobo
Partisipa Enkontru Extraordinariu HMM no RC iha Indonesia
Ministru Saude, Dr. Sergio Lobo, akompanha husi Adjuntu Diretora Fundus Externus, Dra Odete M.F. Belo, Assessor, Dr. Avelino Guterres no Xefi Gabinete, Herminia Ornai, atu partisipa iha enkontru  extraordinariu “Health Minister’s Meeting” no enkontru “Regional Committee iha Yogyakarat, Indonesia. 
Enkontru rutinas ne’e organiza husi Organizasaun Mundial Saude (OMS), nune’e mos iha enkontru extraordinariu entre Ministrus Saude, no mos enkontru entre Ministru Saude ho staffs husi South East Asia Region (SEAR) ou organizasaun Saude balun ho objektivu oin-oin.   
Objektivu husi sorumutu ne’e hanesan enkontru kortezia atu konhese malu nudar Ministru Saúde foun ba V Governu Konstitutional Timor Leste. Ministru Saúde mos aproveita opurtunidade ne’e hato’o informasaun konaba programa no difikuldades nasaun nian ne’ebe infrenta liu-liu iha Ministeriu Saúde atu bele hetan nafatin suporta husi OMS.

Iha viajen dala-uluk ba estranjeirus nudar Ministru Saude, Dr. Sergio Lobo halo sorumutu ho Direktora Geral Organizasaun Mundial Saude, Dra. Margareth Chang.
Iha sorumutu ne’e, Ministru Saude, Dr. Sergio Lobo hato’o informasaun konaba asuntu rekursus Humanus, oinsa atu jere Grupu Estudantes Medicina Atus Hat ne’ebe tinan ne’e sei remata sira nian estudus no simu graduasaun hanesan Mediku Timor Oan iha Nasaun ne’e.

Dr. Sergio Lobo esplika katak, Ministériu Saúde esforsu hela oinsa atu bele absorve médikus foun sira ne’ebe mai. Ministrtu Saúde mos hato’o difikuldades durante prosesu aprendijajem estudantes medisinas hanesan falta teb-tebes livrus iha lian Portugues ba estudantes sira.
Asuntu seluk ne’ebe hato’o maka oinsa Ministériu Saúde hahu ona atu kompleta pessoal Saúde iha teritoriu tomak atu loke kursu formal ba Estudantes Enfermagem no Parteiras Walu Nulu Resin Lima kada tinan. No atu hahu ona Fakuldade ba Dentistas.

Iha okaziaun ne’e, Direktora Geral Organizasaun Mundial Saude, Dra. Margareth Chang hato’o kongratula no husu ba Ministru Saude, Dr. Sergio Lobo atu identifika asuntus epesifikus ne’ebe bele hetan suporta direktamente husi OMS no husi parseiru sira ne’ebe iha rai laran.
Tuir Dra. Margareth Chang katak OMS suporta ona Bibleoteka Azul, maibe presizamente iha Biblioteka ba Medicina, no importante tebes Ministru nia planu atu hahu estabelese telemedicine ho objektivu atu bele hahu ona estuda no deskute kazu moras liu husi dalan ne’ebe efisiente no efektivu.
Problemas hospital ne’ebe la-funsiona ho diak, iha dalan atu bele husu suporta Medikus Cubanus, tanba sira iha experiensia as, oinsa bele organiza no jerre Hospital no defini kazu saida maka Hospital bele halo no kazu saida mak Sentru Saúde bele resovlve no lalika refere mai Hospital.

Dra. Margareth Chang mos akonselha atu  hametin liu tan relasaun servisu ho United Nations Agencia hanesan (WHO, UNICEF, UNFPA) inklui doadores sira hanesan (AusAID, USAid no Banku Mundial), sira mos bele alinha sira nian prioridade tuir Ministériu Saúde ninian no mos presiza haforsa Sistema Jestaun Informasaun Saúde (SJIS) tanba ne’e hanesan fontes  informasaun ne’ebe ho evidensia atu bele hadiak sistema Saúde iha Timor Leste.
Koalia kona ba Saúde Maternu Infantil (SMI) no Life Expectancy Rate (LER) Dra. Margareth Chang hato’o katak iha faktores importantes ne’ebe tenki fo atensaun atu bele hadiak indikadores hirak ne’e hanesan tenki iha kualidade Be-Mos ba komuniade, Sanitasaun ne’ebe diak, tenki hahu ona ho Programa Breast Feending (PBF), Program Nutrisaun, no mos fo importansia ba Programa Familia Planeada. Parseiru Dezenvolvimentus sira bele no iha obrigasaun atu fo apoiu ba nasaun liu husi Ministériu Saúde ba programa sira ne’ebe temin iha leten, no OMS sei lori Nasaun Sanulu Resin ida iha Rejiaun Sudueste Aziatiku atu atinji metas saúde iha ekuidade no ekilibru. MoH/Dr. Odete M.F.Belo

Delegasaun 11 OMS Sudueste Aziatiku




PRESS RELEASE
Delegasaun 11 OMS Sudueste Aziatiku
Hala’o Sorumutu HMM Ba Dala-30 No RC Ba Dala-60 Iha Yogyakarta-Indonesia
Ministru Saúde Dr. Sergio Lobo partisipa iha enkontru Health Minister’s Meeting” (HMM) no enkontru “Regional Committee (RC) iha Yogjakarta durante loron hat,  hahu Tersa feira, 4 to’o Sexta feira 7 Setembru 2012.

Hanesan primeira viagem no primeiru enkontru nudar Ministru Saúde iha V Governu Konstitusional RDTL importante tebes atu apresenta ba membru estadu sanulu resin ida iha Rejiaun Sudueste Aziatiku, Governu nia programas no mos progressu Ministériu Saúde nasaun nian.
Iha loron dahuluk, Ministru Saúde Dr. Sergio Lobo partisipa iha sesaun abertura enkontru HMM Regiaun Sudueste Aziatiku. Iha asuntus hat ne’ebe deskute iha sesaun ne’e maka hanesan:

1. Halo revizaun ba deklarasaun Jaipur “Antimicrobial Resistance” no deklarasaun seluk ne’ebe halo ona no hala’o avaliasaun ba aksaun, desizaun no rekomendasaun ne’ebe hamosu iha enkontru Ministru Saúde ba dala 29 tinan kotuk.
2. Saude ba idozus sira
3. Implementasaun ba “International Health Regulation” tinan 2005 iha OMS Rejiaun Sudueste Aziatiku
4. Estrategia Regional ba “Universal Health Coverage”

Durante Sekretariadu Rejiaun Sudueste Aziatiku hala’o apresentasaun konaba tópikus  iha leten, Ministru Saúde, Dr. Sergio Lobo halo mos ninia intervensaun atu asegura desizaun ne’ebe foti iha enkontru Nivel Ministerial ne’e.

Hafoin enkontru HMM Regiaun Sudueste Aziatiku loron tomak hotu, kontinua ho enkontru Regional Committee  ne’ebe hala’o durante loron tolu husi Kuarta feira, 5 to’o Sexta feira, 7 Setembru 2012. Topikus importante no interesante ba Timor Leste ne’ebe deskute iha enkontru RC maka hanesan:

1. OMS Rejiaun Sudueste Aziatiku hato’o relatoriu Biennual periode 1 Janeiru 2010-31 Dezembru 2011,
2. Programa “WHO reform “
3. Program Budget
4. Asuntus teknikus :
a. Prosesu Nomeasaun ba Direktur Rejional,
b. Doenças Não Contagionsas,
c. Oinsa OMS jere problemas emergensias,
d. Apresiasaun ba grupo diskusaun konaba falsifikasaun aimoruk,
e. Oinsa nasaun ida-idak prepara-an ba Pandemia Influensa,
f. Kobertura imunizasaun,
g. Difikuldades atu eradika moras poliomielitis,
h. Estrategia rejional ba Universal Health Coverage no
i. Dezenvolvimentu kapasidade ba membru estadu sira,

Apresiasaun ne’ebe hetan iha enkontru HMM iha Rejiaun Sudueste Aziatiku katak, servisu hamutuk ba dezenvovimentu global bazeia ba prinsipius jerais ne’ebe bele defini husi responsabilidade, kapasidade no presiza iha partisipasaun maksimu husi lideransa ne’ebe iha relasaun ho desizaun politika. Servisu parseria ne’ebe ita halo tenki iha objektivu atu benefisia  povu iha nasaun ne’ebe foin dezenvolve-an no nasaun ida-idak iha responsabilidade hanesan atu bele hetan benifisius ne’ebe ekilibru atu bele infrenta kompleksidade global ne’ebe hasoru.

Intervensaun ne’ebe delegasaun hato’o relasiona ho tópikus ne’ebe iha leten katak Governu Timor Leste nia programa alinha nanis ona ho programa OMS nian, maibe iha implementasaun presiza tebes apoiu husi OMS.
Durante enkontru, Ministru Saúde Dr. Sergio Lobo hala’o mos enkontru extraordináriu ho Ministra Republika Indonesia dr. Nafsiah Mboi, Sp.A, MPH, koalia konaba implementasaun akordu ne’ebe asina iha Governu anterior.

Nudar Ministru foun importante tebes atu uza opurtunidade ne’e atu halo enkontru kortezia ho Dra. Margareth Chang, Direktora Geral OMS atu hato’o programa Saúde ba V Governu Konstitusional RDTL no husu nafatin apoiu tekniku husi OMS. Atu realiza proposta hirak ne’e iha mos enkontru dala ikus ho Direktor Rejional OMS Regiaun Sudueste Aziatiku Dr. Samlee Samlee Plianbangchang ho Vice Direktora Rejional, Dra. Poonam Khetrapal Singh. MoH/Dr. Odete M.F. Belo
 

Thursday, September 06, 2012

Delegasaun Membru Parlamentu Australia no Nova Zelandia Vizita TL

Delegasaun membru Parlamentu husi Australia no Nova Zelandia, akompania husi Diretor Geral Ministeriu Saude, Agapito da Silva Soares, Tersa feira,  04/09, horseik hala’o vizita servisu ba Distritu Manatutu.
Objetivu vizita ne’e, atu hare’e progresu kondisaun saude iha Distritu refere. Delegasaun membru parlamentu husi nasaun rua ne’ebe hamutuk nain sanulu resin ne’e, halo mos dialogu ho kumunidade no lideres lokais, atu identifika problemas saude ne’ebe komunidade sira hasoru iha baze,  no identifika prioridade ne’ebe Distritu presija atu hetan tulun.
Iha okaziaun ne’e, Diretor Geral Ministeriu Saude, Agapito da Silva Soares hateten, objetivu jeral vizita delegasaun membrus parlamentu husi nasaun rua iha Timor Leste, atu hametin kooperasaun  entre nasaun tolu, Australia, Nova Zelandia, Timor Leste  no parseiru Fundu Global iha partes saude.
Iha sorumutu ho delegasaun membru parlamentu husi nasaun rua iha salaun Ministeriu Saude, Diretor Geral, Agapito da Silva Soares hateten, apoiu husi Governu Australia no Governu Nova Zelandia ba Timor Leste iha area saude, signifikante tebes.
Apoiu husi Governu Australia no Nova Zelandia fo ba Timor Leste iha area saude, ajuda ona pelumenus bele atinji dezenvolvimentu saude. “Tanba ne’e, Ami nafatin hein Governu rua nian apoiu ba Timor Leste, liu-liu iha area saude”, hateten Diretor Geral, Agapito da Silva Soares.
Realidade hatudu Governu Australia no mos Governu Nova Zelandia fo ona tulun barak ba Governu Timor Leste iha area saude ne’ebe hetan fundus barak husi Fundu Global. Programa prioridade ne’ebe agora hetan tulun husi Fundu Global maka hanesan, Malaria, HIV/AIDS, TBC, no ect, hateten Diretor Geral, Agapito da Silva Soarea.
Iha sorumutu loron ida ho komunidade, lideres lokais, funsionariu saude no Administrador Distritu Manatutu, Xefi Delegasaun membru parlamentu Australia no Nova Zelandia promote katak, Governu rua Australia no Nova Zelandia nafatin prontu fo tulun povu Timor Leste iha area saude. No, liu husi programa vizita ne’e, realidade kondisaun saude ne’ebe agora povu hasoru, promesas ne’e sei la-monu, no sei iha apoiu kuntinuasaun ne’ebe diak no lolos. MOH