Tuesday, February 22, 2011

Asaun Ministerio Saúde Liu Husi Departamentu Farmasia Responde Ba Stock Out Aimoruk iha Fatuberlihu No Alas

Fevereiru 2011
Dili Saúde-semanal,Relasiona ho stock out aimoruk ne’ebé identifika iha CHC fatuberlihu no CHC Alas wainhira ministru Saúde hala’o Vijita de traballu iha fatin ne’ebá, Ne’ebé fo sai iha Saúde semanal edisaun tersa feira 22 Fevereiru 2011, Hetan kedas intervensaun masimu husi Xefe Departamentu Farmasia Antonio iha idifisiu Servisu Centrais Ministerio da Saúde Kaikoli, Dili.
Antonio ba Saúde-semanal hateten “vizita iha sesta semana kotuk ne’ebé hau rasik akompanha S.E ministru hare diretamente situasaun iha CHC fatuberlihu no CHC Alas klaru katak ita iha duni Stock out aimoruk nune’e intervensaun rapidu ne’ebé agora dadaun ita halo mak tenki distribui aimoruk urjente ba fatin sira ne’ebé refere. Hau rasik iha altura ne’ebá hetan kedas instrusaun husi Ministru Saúde no tau kedas kestaun ida ne’e hanesan prioridade”. Antonio klarifika.
“ iha segunda semana ne’e duni hau komfirma konaba kestaun ida iha SAMES (Servisu Autonomo medikamentus no Ekpamentus Saúde) No prepara Item sira ne’ebé sira (Fatuberlihu no Alas) presiza hodi distribui urjentemente ba iha ne’ebá, Horisehik hau kontaktu diretamente ba Direktor SDS Manufahi no agora dadaun sira iha ona dalan tuun mai Dili hodi foti rekizasaun Aimoruk ne’ebé bazea sira nia pedidu”. Konfesa Antonio ba Saúde-semanal iha edifisiu servisu centrais Ministerio Saúde Caikoli.
Antonio mos realsa katak CHC fatuberlihu iha 13 item mak stock out, Alas iha 25 Item. Ho esforsu masimu ne’ebé agora dadaun sira halao Nune’e sira mos garante katak iha semana ida ne’e ka semana oin stock aimoruk iha SAMES sei lao normal hanesan bain-bain. Atu reponde ba nesesidades Fatuberlihu no Alas no iha teritoriu laran tomak hau sinte sei la iha problema. Nune’e buat hotu rezolvidu.MS001

Inkontru Konsellu Distrital De Saude SDS Manufahi No Estudantes Medisina

Manufahi saude-semanal,Vijita traballhu Ministru saude Nelson Martins ba Distritu Manufahi, Sub-Distritu Fatuberlihu no Alas la’os supervision no fiskaliza knar nain saude sira nia servisu deit, Maibe oinsa atu haklaken no habelar informasaun konaba diploma ministerial numeru III/2008.
Koalia konaba kompetensia husi director no xefe CHC sira oinsa bele rejolve no deside rasik prioridades sira ne’ebé komunidade infrenta. Inkontru ne’ebé lidera diretamente husi Dr. Nelson Martins ho profesionais saude sira iha sabadu semana kotuk mai ou menus 21.30 Otl kalan iha DHS Manufahi hetan partisipasaun masimu husi Direktor Saude Distritu Xefes CHC no profesionais saude sira balun.
“Kompetensia ka saida mak fo ona ba distritu sira tuir lolos sira iha kompetensia rasik, para garante asesu saude ba populasaun iha area ne’ebé mak fo ona ba sira, sem husu orientasaun ba taan iha leten neba sir abele deside rasik, Dalabarak seidauk implementa didiak nune’e ida hanesan responsabilidade hau nian atu bele hakbesik aan liu ba sira hodi klarifika diretamente konaba lei diploma ministerial ne’ebé dalabarak sira seidauk kompriende didiak” hatan Ministru saude iha intervista ba jornalista sira iha SDS manufahi.
Iha ne’e, Iha SDS Manufahi iha orgaun ida ne’ebé kapas teb-tebes, iha membru de konsellu saude distrital forte teb-tebes ne’ebé mak sei sai hanesa orgaun de konsulta ida ba Direktor saude Distritu. Konsulta fo pareser para nia bele foti desizaun saida deit hodi rejolve problema saude nia saida deit mak iha teritoriu same ne’e nia laran.
Dalabarak sira nunka lee lei ne’e halo didiak entaun sira sempre fo sala ba sentral maibe ho lei ida ne’ebé agora dadaun ne’e bele fo dalan ona ba servisu saude Distrital sira atu bele foti desizaun.
“ida ne’e hanesan primera ves vizita ministru nian hodi inkontru konaba lei diploma ministerial nian director saude ditrito Manufahi ba saude-semanal hateten durante ne’e sira rasik iha SDS manufahi foti ona desizaun balun liu husi konselu distrital de saude hodi atende ba problema ne’ebé afeta ba servisu saude nian iha baze nian. Nune’e sira mos agradese ho breafing ministru nian bele loke taan dalan hodi nune’e ami bele hare ba prioridades knar nain saude iha distritu no espesialmente atu atende saude komunidade.
Mais ou menus 21.44 Otl Dr. Nelson kontinua ekontru ho estudantes medisina no medikus timor oan balun ne’ebé remata ona sira nia estudus iha cuba ne’ebé agora dadaun halao sira nia knar iha SDS Manufahi.
Sorumutu ne’e atu rona diretamente problemas, Dezafius, no kondisoins ne’ebé agora dadaun knar nain saude sira infrenta iha Distritu ne’ebé refere tanba realidade hatudu katak iha CHC no HP balun ne’ebé la garante ba sira atu praktika ka servisu.
Hatan ba kestaun hirak ne’e ministru saude komfesa sei esforsu makas hodi kopera hamutuk ho ministerio edukasaun hodi rejolve problema ne’ebé refere iha tempu badak. Nune’e hafoin intervista komitiva ministru saude kontinua desloka ba Ospital Maubisse mais ou menus tuku 22.43 Otl MS001

FEATURE UMA TOHAR WEDAUBEREK


Saude-semanal
Observasaun Saúde-semanal ministerio da Saúde RDTL nota katak Difikulidades no prekupasoins hotu ne’ebé komunidade Alas no Fatuberlihu, espesialmente Distritu Same kestiona ba Ministru Saúde ne’e la’os akontese deit iha fatin ne’ebá maibe kuaze iha fatin hot-hotu iha teritoriu laran tomak. Dezafius sira ne’ebé agora dadaun knar na’in sira atravesa iha fatin ne’ebá akontese tanba seidauk iha planu ida ne’ebé seguru no di’ak no falta kapasidade iha jestaun no adminitrasaun no sorin seluk bele mos akontese iha Finansas.
Stock-out aimoruk, Problema rezistu Saúde maternu infantil, inklui mos TBC, Malaria no Logistik akontese tanba pesoal Saúde sira seidauk iha planu ne’ebé di’ak, Presija tebes knar na’in Saúde sira atu hetan kapasitasaun. Husi treinamentu oin-oin mak bele muda ema nia vida servisu nian. Iha termus profisional sira iha kapasidade no iha kbiit espiritu servidor ne’ebé forte teb-tebes (Tidak Di Ragukan Lagi), Tanba hare husi realidade katak iha fatin balun ne’ebé dook husi CHC no DHS maibe sira konsege hakat to’o iha komunidade nia leet mesmu tenki hasoru dezafius oin-oin, Dook, Hamlaha, Hamrook, no sel-seluktan ne’ebé kadaves halo ita hanesan ema kriatura normal nia mentalidade bele muda maibe sira fiar aan no sira pronto nafatin atu servi komunidade rurais.
Hafoin remata aktividade Offisial ministru Saúde nian iha Fatuberlihu no Alas, Ministru Saúde aproveita tempu oituan halo mos vizita ba uma tohar wedauberek, Alas, Manufahi.
Anselmo hanesan ema ida ne’ebé durante ne’e saran nia aan hodi kura pasientes tohar hanesan iha Ain, Liman, Kakorok inklui mos moras sira ne’ebé iha relasaun ho ruin nian Ho meus tradisionais. Iha oportunidade ne’e Anselmo ne’ebé fo ona tratamentu barak ba komunidade no hetan rejultadu di’ak informa ba ministru Saúde katak problema ne’ebé agora dadaun sira infrenta mak kondisaun uma atu simu pasiente atu hodi halo tratamentu.
Hatan ba difikulidades ne’e Dr. Nelson Martins hateten bazeia ba Diploma ministrial nian fo mos atensaun ba aimoruk tradisional tanba ne’e Xefe iha Saúde Distritu no CHC tenki buka dalan hodi rejolve “ lei fo ona dalan ba Saúde distritu sira katak sira mos bele deside prioridades inklui aimoruk tradisionais sira. No sira iha kompetensia rasik atu deside, nune’e agora dadaun CHC alas mos bele servisu hamutuk no propoint orsamentu hodi nune’e bele hare hamutuk moras sira ne’ebé hanesan tohar bele apoia.”tenik Nelson Martins.
Sorin seluk waihira Saúde-semanal tenta dadalia ho director Saúde distritu manufahi Alberto Martins salienta katak “durante ne’e ami iha koperasaun di’ak ho uma tohar ne’e maibe konaba hadia uma nian ami sei hare lai ba orsamentu ne’ebé iha”. Konfesa Alberto Martins.
Aleinde ne’e ministru Saúde sinte interesadu ba fatin ne’e tanba pasientes ne’ebé ruin tohar la’os mai husi deit fatin ne’e maibe kuaze iha distritu sanulu resin tolu ne’ebé agora dadaun halo hela tratamentu intensive MS001

Ministru Saúde Vizita Sub-Distritu Alas



Fevereiru 2011
Hafoin vizita sub-distritu Fatuberlihu Komitiva Ministru Saúde kontinua hala’o vizita traballu ba sub-distritu Alas. Komunidade sinte antusias teb-tebes ho vizita ministru Saúde nian ne’e tanba hanesan mos primera vizita wanhira IV Governu estabelese iha Rai Republika ida ne’e, komunidade sub-distritu simu komitiva ho Dansa, Vidu no aprezenta arte kultura oi-oin.
“Iha difikulidades barak ne’ebé hau hakarak relata ba S.E Ministru Saúde konaba situasaun ne’ebé agora dadaun povu infrenta liu-liu iha baze no espesialmente iha sub-distritu alas nian”. Tenik Administrador Sub-Distritu iha ninia Diskursu.” Husu mos ba S.E atu konsidera criteria no geografika sub-distritu nian”.
Entre tantu Dr. Nelson iha nia intervensaun hateten,” Hau mai atu hare rasik situasaun real iha sub-distritu ida ne’e mak ohin hau too iha ne’e”. Iha 1999 hau rasik fo assistensia ba komunidade iha ne’e no altura ne’ebá hau hateten loron ruma se ita ukun aan, Hau sei mai iha ne’e mai hamutuk imi hotu. Situasaun perigu teb-tebes hau rasik fo konsulta ba komunidade balun iha mota ulun Becora (Dili) ne’ebá hanesan ema mediku ida.
“Atu hateten katak iha susar no terus nia laran ita sempre hamutuk, ne’e duni ohin hau mai fali iha ne’e atu haktuir katak, Ita sempre hamutuk nafatin iha tenpu saida deit”. Ita hotu hatene katak wainhira iha 1999 ema hotu tauk no lakohi liga semak lori aimoruk hodi konsulta. Madre sira, no hau rasik organiza maluk joventude lubuk ida husi Villa Verde no matadoru tau hamutuk aimoruk lori ba hodi fo assistensia ba maluk sira ne’ebé altura ne’ebá presija tebes tulun”.
Atu hateten Vizaun ministerio Saúde ba 2030 vinte anus ba seitor Saúde ita presija konstroe 750 postu Saúde, Agora dadaun ita foin konstroe 180 iha timor laran tomak.
Ita nia nasaun foin mak ukun aan, Nasaun foin mak hanesan bebe ne’ebé foin dolar maibe ita boot sira obriga halai kedas? Ejijensias barak teb-tebes. Agora dadaun ita hotu iha ne’e atu hatutan deit ita nia luta, luta ba libertasaun total ita kontinua ba oin nafatin. “SIRA NIA MATE PARA ITA KONTINUA ITA NIA LUTA” ba liberta povu presija sakrifisiu. Labele ansi nasaun tenki lao neneik mas bebeik, tenki fiar aan labele lakon kbiit.
iha 2030 iha suku ida sei iha dotor ida, parteira rua, imfermeiru rua Analista ida iha kada suku. Tanba saida mak hau hateten hanesan ne’e ema ida kuandu atu hasai kursu Dotor presija tinan hitu, nasaun hanesan timor leste presija 300 espesialistas, maibe agora dadaun akontese iha timor realidade hatudu ita foin iha espesialista nain haat.
Iha fin de anu 2011 ita komesa ona produs infermeiru 35 parteira 40 ema ne’ebé mak ita rekruta suku nia oan duni, Iha fin de anu 2012 ita produs tab 75 infermeirus, 75 parteiras DIII sira laos ona hanesan uluk ita dehan SPK.

Ita nia rekursus la to’o, Tanba ne’e mak ita hetan apoia husi ita nia kamarada sira, Kompanheru sira husi rai ketan Cuba, Mai hodi apoiu ba ita nia rekursus ne’ebé kurang duni. Hareba prekupasaun husi administrador no Xefe suku sira ne’ebé hateten katak ita presija tebes rekursus na realidade wainhira dotores sira kuandu mai halo knar iha ne’e joventude sira ba tuda ema nia akomodasaun,” Iha manatuto Joven sira sona Dotor ida, Iha likisa Joven sira tuda rahun dotor sira nia horik fatin.
Iha alas tuda tiha dotora nia uma ikus mai dehan ami mak sala ka ministerio Saúde mak sala ne’e tenki bolu atensaun.
Se lider eleitu ida mak la hatene kontrola ninia komunidade ne’e susar oituan. Keta halo hanesan ne’e maluk sira ! ita nia povu terus no mate barak ona ba ida ne’e. Ministerio Saúde tau dotor sira hodi fo assistensia ba maluk sira ne’ebé presija tebes tulun. Maibe ho atetudi hirak ne’e bele halo dotor sira tauk no prezudika fila fali maluk sira ne’ebé presija tebes asistensia ne’e tenki kuidadu.
Laos geografiku sai hanesan problema ba profesionais Saúde ida atu halo ninia knar maibe ita nia hahalok diak ema sei mai.
Dehan agora kedas haruka parteira ida mai laos buat ne’ebé susar maibe klaru katak iha duni vagas barak iha ministerio saude nian maibe ema mak la iha, se Xefe Suku sira identifika Parteira ka infermeiru balun iha suku ne’e nia laran bele haruka mai agora no ita kontratu kedas iha fatin ne’e.
Laos ida ne’e deit maluk sira agora dadaun estudante lubuk ida husi Cuba atu mai ona halo sira nia estajiu iha, maibe se sira mai mak ita boot sira tuda sira, ita boot sira la fo bee ba sira, entaun sira mai atu halo saida. Hau hanoin ba ema isin diak la presiza maibe oinsa ho inan isin rua sira, oinsa ho ferik katuas sira ne’ebé presija konsulta ita halai ba iha ne’ebé.
Nune’e hau apelu ba Xefe Suku Alas tomak, Lia Nain sira hamulak ba atu ita nia nasaun lalika taan iha violensia.
“haruka kareta multifunsaun mai betanu, imi tuda rahun tiha ikus mai husu taan ambulansia multifunsaun, iha Ossu kaer kareta halo monu nune’e to’o agora ami la haruka kareta, iha laga hemu lanu ba soe tiha kareta. Betanu tuda rahun kareta multifunsaun depois hau hateten imi hein lai kuandu teritoru laran tomak kompleta ona mak ami sei tau fali iha planu hodi sosa foun.
Iha parte seluk wainhira saude-semanal komfirma kestaun inseguransa ba profesionais saude sira iha Distritu Manufahi komandante PNTL sub-distritu Lemos de Andrade hateten agora dadaun sira kontinua halo vijilansia ba fatin sira ne’ebé ameasa ba knar nain saude sira. “ durante ne’e PNTL Distritu Manufahi sempre halo patrulha rutina iha fatin sira ne’ebé deskofiadu hanesan perigu tantu loron no kalan, akontesementu ne’ebé ohin sr. Ministuru fo sai ne’e klaru teb-tebes katak altura neba hau haruka duni ekipa task force ba fatin akontesementu no agora dadaun ami sei buka hela dadus hodi kaptura suspeitu sira ne’ebé halo atentadu ba kareta multifunsaun iha BETANU alas ne’e” konfesa Lemos de Andrade ba Saude semanal.
Lemos de andrade realsa katak akontesimentu neba rejulta ambulansia multifunsaun hetan estragus ne’e iha kalan no sira la konsege kaptura maibe komandante apelu ba komunidade atu lalika halo asaun oin-oin hodi estraga fasilidades saude nune’e ami nia ekipa investigasaun agora dadaun iha ona komunidade nia leet hodi halo estudus no kaptura aisasik ne’ebé nakukun.
Sorin seluk wainhira saude-semanal dadalia ho Administrador sub-Distritu Alas Fernando da Costa realsa katak sira kontente teb-tebes ho vijita ida ne’e tanba Ministru rasik bele hare diretamente kondisaun Sub-Distritu nian no rona prekupasoin komunidade nian.
Fernando hatutan desde uluk administrasaun sub-Distritu Alas sempre iha kordenasaun diak ho knar nain saude sira liu-liu kopera iha Servisu integradu saude komunitaria SISCa nian. Habelar informasaun ba komunidade konaba programa saude nian ne’ebé prioridade ba komunidade.
“Ohin hau relata tiha ona ba S.E ministru katak iha ne’e /sub-distritu Alas knar nain saude sira servisu diak teb-tebes mesmu hasoru difikulidades oin-oin maibe sira konsege halao servisu lubuk ida. Iha ne’e iha postu saude haat, iha infermeiru nain haat menus liu mak parteiras. MS001

Monday, February 21, 2011

Intervista Ministru Saúde Konaba Objektivu Vizita Iha Same/Fatuberlihu 2011


17 fevereiru 2011
Ohin ita mai iha ne’e no hau rasik mai hodi hare diretamente situasaun real ne’ebé agora dadaun iha ita nia komunidade nia leet, Nune’e atu kompleta hikas hau nia vizita durante la’o haleu distritu no sub-distritu iha teritoriu laran, Hodi kompleta servisu ofisial ministru nian hodi tuur hamutuk ho knar na’in Saúde sira.
Dezafius no difikulidades oin-oin mak ita hare rasik ho matan, Geralmente servisu hotu la’o di’ak. Maibe iha mos falhansu tekniku balun ne’ebé haktuir katak ita iha duni stock out aimoruk oituan iha sub-distritu Fatuberlihu ne’e, Problema oituan iha Saúde maternu infantile, Liu-liu iha rejistu Saúde familiar. maske ita nia parteira sira servisu makas teb-tebes maibe seidauk identifika lolos ita nia inan feton sira ne’ebé mak isin rua no hira mak tuur ahi iha nee.
Aproveita ho okaziaun nee rekomenda ba Direktores sira liu-liu xefe CHC sira atu bele implementa didi’ak Saúde familiar hodi nune’e bele hatene ema hira mak iha potensia ba isin rua iha sub-distritu fatuberlihu no inan isin rua hira mak partus iha fulan ida nia laran.
Aleinde ne’e Ministru Saúde hateten hanesan ema professional Saúde tenki servisu makas maske iha suku balun ne’ebé dook maibe tenki esforsu makas hodi to’o iha sira nia leet. Ita nia rain mak hanesan ne’e ona,” “se ita la hakbesik aan ba komuniadade sira nebe dook iha ne’ebá, Entaun ita nia profesionalizmu iha ne’ebé. Falta de planeamentu, Hau rona husi xefe CHC sira dehan katak aimoruk buat hotu la’o di’ak, Maibe realidade hatudu oin seluk ohin hau observa diretamente hatudu katak ita iha stock out aimoruk ne’ebé frazil oituan”. Katak ministru.
Iha ne’e duni hau bolu atensaun ba xefe departamentu farmasia no officer farmasia Sub-distritu fatuberlihu nian oin nusa para aimoruk ne’e tenki mai duni iha tenpu barak.
Ministru saude mos realsa katak Referensia balun ne’ebé hau hetan husi dotor no knar na’in Saúde sira iha ne’e katak moras ne’ebé agora dadaun aas iha sub-distritu Fatuberlihu mak Malaria, Rezistu Saúde familiar la duun di’ak no atendementu ba moras TBC sira kuaze la duun adekuada. Maibe geralmente servisu hotu la’o di’ak so iha buat balun ne’ebé ita presiza hadia di’ak liutan iha future oin mai.
Iha parte seluk Dr. Nelson Martins haktuir; Dialogu ho komunidade kapas teb-tebes. Tanba husi dialogu ne’e ita hatene katak medikus barak mak mai husi fatuberlihu ne’e. Nune’e hodi Ministériu Saúde nia naran no reprezenta governu tomak hato’o ami nia agradese wain ba inan aman sira ne’ebé haruka ona sira nia oan hasai kursu ba medikus, Parteiras, Infermeirus no profesionais Saúde sira seluk. Nune’e apelu mos sub-distritu sira seluk ne’ebé iha teritoriu laran ne’ebé susar atu hetan profesionais Saúde atu ba nati tuir inan aman sira ne’ebé iha fatuberlihu.
Hatan konaba falhansu husi knar na’in Saúde sira ne’ebé halo aimoruk stock out iha sub-distritu Fatuberlihu ministru Saúde akresenta katak, ida ne’e hanesan problema kapasidade iha pleneamentu iha termu gestaun tuir lolos, Lalika hein to’o zero mak foin halo rekizasaun no tenki hare mos ba geografika katak Dili VS fatuberlihu dook teb-tebes.
Dr. Martins mos salient liutan katak ida ne’e la’os falha deit iha fatin ida ne’e, Maibe kuaze iha fatin hot-hotu hau la bele dehan katak ita bele rejolve problema aimoruk iha tenpu badak wainhira ita seidauk iha fabrika aimoruk rasik. Ita seidauk iha fundu capital ba SAMES para bele halo nia sai hanesan emprensa publiku, sei akontese nafatin Stock out. Maibe ita sei iha esperansa rejolve problema hirak nee wainhira ita iha planeamentu ne’ebé di’ak.
Husi Vizita sira ne’e mak ita bele hatene situasaun real iha ita nia komunidade no liu-liu mak knar na’in Saúde sira infrenta iha terenu ne’ebá no husi referensia sira ne’e mak ita bele dezenhu prioridades hodi servi ba komunidade nian.
Sorin seluk prezidente ba komisaun Nasional kontrola no responde malaria no dengue Dr. Nelson Martins hateten. “2011 hanesan anu rekursus Umanus ba Ministériu Saúde nune’e ami tenta atu hare to’ok,Oinsa ministerio saude bele loke kursu ka treinamentu ida ba profesionais Saúde sira nunee ami sei hareba oinsa kria ninia jestaun. Iha termus klinikus, Atendementus hau hanoin ita nia dotores, infermeirus, Parteiras sira iha kapasidade atu halo intervensaun kliniku. Problema boot ne’ebé agora dadaun Ministériu Saúde infrenta mak Jestaun, Administrasaun, Finansas. Ida ne’e dalaruma la’os Ministériu Saúde deit mak infrenta maibe kuaze ministeriu hot-hotu.

Konaba prekupasaun komunidade nian ne’ebé hateten kadaves dotor foun sira la duun iha kapasidade hodi fo atendementu no assistensia ba komunidade !
Dr. Nelson Martins, MD,MHM, PhD iha ninia intervensaun hateten, Iha mundu ne’ebé deit wainhira ita foin hetan graduasaun klaru katak depende ba kazu ne’ebé mak ita estuda. Perguntas sira ne’ebé ita nia komunidade husu refere ba duni ita nia alin oan estudante sira ne’ebé foin akaba sira nia kursu. Maibe atu hateten katak ita la’os atu minimize sira nia kapasidade, Tanba realidade hatudu katak sira mesak ema ne’ebé matenek. Maibe dalabarak moras ne’ebé sira hare iha ne’e la hanesan iha Cuba tanba realidade hatudu moras balun iha Cuba maibe timor la iha no moras ne’ebé iha timor dalaruma iha cuba la iha. Nunee husi estudo lor-loron mak sira sei sai hanesan dotor nebe diak iha loron ida.
Nune’e ministru Saúde ho lian makas hateten Ministériu Saúde RDTL iha konfiansa boot tebes ba Jerasaun profesionais Saúde foun ne’ebé agora dadaun estuda hela iha Cuba, Indonesia, Filipina, no iha fatin sel-seluk nune’e husu ba komunidade tomak atu bele apoia sira nia knar hodi nune’e sira bele fo assistensia di’ak ba komunidade liu-liu komunidade sira ne’ebé hela iha foho leten, Area rurais, area remotas, no dolok ku’ak “nelson Maritns”.MS001

Diskursu ministru saude Dr. Nelson Martins iha Dialogu ho Komunidade sub-Distritu Fatuberliu, Distritu Same


17 fevereiru 2011
Agradese teb-tebes ba partes hot-hotu ne’ebé simu ami iha fatin ida ne’e. Ami nia planu mai iha sub distritu ida ne’e atu halo supervizaun, No evaluasaun ba knar nain saude sira no oinsa atu hare diretamente progressu servisu knar nain saude sira nian iha terenu.
Atu informa ba Maluk sira hotu ne’ebé ohin marka prezensa iha fatin ida ne’e katak, Hau nia vizita mai iha Fatuberlihu ho Sub Distritu Alas ida ne’e atu kompleta hau nia vizita hale’u Sub-Distritu ne’en nulu resin lima iha rai doben ida ne’e.
Ami tama kuaze postu saude hot-hotu, Analiza servisu, oinsa bele hadia liutan servisu, oinsa bele fo assistensia ne’ebé diak liu ba ita nia populasaun.
Difikulidades no dezafius ne’ebé administrador hato’o iha ninia intervensaun ne’e la’os akontese iha fatin ida ne’e de’it maibe akontese kuaze iha teritoriu laran tomak. Iha inisiu 2007 wainhira hau mai halo vijita iha Distritu Same, Kuaze CHC barak mak seidauk iha, Postu saude barak seidauk hari no balun ate a data seidauk hari. Progresu no realidade hatudu katak agora dadaun ita komesa iha mudansa.
Agradese ba inan aman sira ne’ebé fo sira nia oan ba hasai kursu konaba medikus, Parteiras, no profesionais saude oi-oin. Hau kontente teb-tebes wainhira hau rona katak iha Distritu Manu fahi Fatuberlihu nia oan barak mak sai hanesan knar nain saude hale’u teritoriu ne’e.
Hodi Ministeriu saude liu-liu Governu RDTL hau apresia no agradese teb-tebes ba ita bo’ot sira nia esforsu.
Oinsa planu Ministeriu saude nian iha area rekursus umanus, liu-liu hareba realidade katak susar atu haruka ema seluk ne’ebé la’os Distritu ne’e nia mai hala’o knar iha ne’e. Nune’e iha governu anterior Estadu hola desizaun ne’ebé brani teb-tebes haruka estudante rihun ida ba Cuba hodi hasai sira nia kursu konaba Medikus. Rekruta husi fatin hot-hotu, Rekruta husi Sub-distritu hot-hotu.
Agora dadaun Ministerio saude Esforsu makas, Atu reintegra sira atu tama hikas ba instituisaun estadu. La kleurtan iha fin fevereiru 2011 ita sei iha 465 estundantes timor oan ne’ebé iha cuba, Agora dadaun kompleta ona kintu no sestu anu iha ne’ebá atu mai hala’o sira nia estaziu iha ne’e, Hodi apoia sistema saude.
Tinan rua taan ita sei halo graduasaun ba estudante medisina geral bazika. Se buat hotu lao diak tinan tolu taan ita sei iha 503 medikus.
Atu hateten katak sei fahe Dotor ida iha kada suku ita atinze ona. Nune’e atu hateten ba maluk sira katak ministeriu saude sei la hamriik ho dotor de’it, Iha parteiras, Analista, Infermeirus, Farmasistas, tekniku radiolozia, tekniku laboratoriu no partes oin-oin ne’ebé agora dadaun ministerio da saude investe ba.
Planu recursus umanus ba 2030 ami investe ona iha ne’ebá, Iha 2008 ami lidera ekipa ida ba Filipina, hasoru Ministru Saude Filipina, Reitor UP univesidade Filipina. Hafoin vijita ami konvida sira atu mai hamutuk ho UNTL liu husi Ministeriu saude RDTL hodi loke DIII ba parteiras, no Infarmazen.
Ho okaziaun ne’e ami rekruta duni suku nia oan sira, Tinan-tinan ami rekruta nain rua husi kada suku iha teritoriu laran. Iha tinan 2011 ne’e kuandu buat hotu lao diak ami sei halo graduasaun ba 38 parteiras no seluk infermeirus ho total 68 pesoas DIII.
Nune’e atu informa de’it katak ministerio saude iha tinan 30 nulu ne’ebé mai, sei la iha taan parteiras ka infermeirus hanesan uluk dehan SPK, minimal bachelor degree. Ne’e mak planu ministerio da saude nian hau fiar katak sei iha Dotor 1 iha kada suku iha tinan 30 ne’ebé mai agora.
Iha tinan 2010 Ministeriu saude RDTL haruka ona medikus hamutuk 18 ba hasai sira nia espesialidade iha Padjadjaran UNPAD Indonesia, Nain haat iha UI, Nain ne’e agora dadaun atu ba ona undana bali hodi hasai espesialista, Nain rua Fiji, Nain rua iha Filipina ne’e para atu komesa ona eskola espesialista.
Vizaun ministerio saude nian iha 2030 iha suku ida sei iha dotor ida, parteira rua, imfermeiru rua Analista ida iha kada suku.
Timor leste sei sai hanesan Nasaun ne’ebé ho rasio dotor/populasaun terbaik iha Asia nia laran. Konaba infra-estrutura ita sei presiza taan 750 postu sanitariu. Hareba realidade ho kapasidade orsamentu ne’ebé agora dadaun ita iha agora dadaun timor leste foin iha 180 postu saude. Neneik mais bebeik ita kontinua lao nafatin belun sira.
Ita sei halo taan centru saude lima, Ospital Distrital sanulu resin tolu ho kapasidade kamas 50 to’o 75. Ospital regional 2 ita sei halo taan ita nia Ospital nasional ida ho kapasidade kamas 400 too 500 ne’e programa ba oin. Ita sei la hare taan Malaria, iha fulan marsu agora ministerio saude sei deklara eleminsaun lepra iha timor. Prevalensia Lepra tuun ona menus husi 1 %. Moras sira hanesan uluk polio, agora la iha ona, Tifus, Diteria agora la iha ona.
Moras malaria tinan-tinan tuun makas, tanba partisipasaun komunidade nian, SISCa ami sempre hala’o. Halo limpeja ba ita nia uma sor-sorin hela iha uma ne’ebé saudavel, labele husik bee nalihun arbiru.
SISCa la presiza Cede, Postu, SISCa bele halo iha natar laran, Ai okos, cede Suku, Bele halo iha kapela. SISca bele halo iha fatin ne’ebé de’it SICa presiza tebes partisipasaun Masimu husi komunidade sira nian.
Demographic health survey ne’ebé foin lalais hala’o hatudu rejultadu diak teb-tebes, Taxa mortalidade infantil tuun makas, Husi 60 ba 44 % hatudu katak ita atinze ona mentas dezinvolvimetu millennium ba taxa mortalidade infantil. Taxa mortalidade maternal mos tuun makas, timor oan sira uluk ne’ebé rata-rata oan 7 bazeia ba estudus agora dadaun uma kain ida kuaze hetan oan liama.
Kbiit moris ka harapan hidup ne’ebé populasaun timor leste iha bazeia ba estudus no survey hateten katak rata-rata mane kbiit moris 61 no feto kbiit moris 62.
Maske atravesa dezafius no difikulidades oin-oin maibe timor leste tenki lao ba oin nafatin. Ministerio da saude sei esforsu aan makas hodi atinze MDG’s Oin-oin Rai REPUBLIKA IDA NEE. MS001

Monday, February 14, 2011

Dr. Martins Halao vijita Kortejia ba Katedral Maliana Iha Rezidensia Mgr. Dom Alberto Amaral, Bispo Diocese Maliana


Atu halo supervizaun ba knarr nain saude iha teritoriu laran tomak liu-liu halo inkontru konsellu administrasaun distrital no enkontru konsellu Administrasaun ho Ospitais referais, Ministeriu liu husi Dr. Nelson Martins halao vijita de traballu durante loron rua iha Distritu Maliana. objektivu Geral husi vijita trabalhu nee mak Halao encontro ho Concelho Administração Hospital Referencia Maliana, Halao encontro ho Estudante Midicina, Halao encontro ho Mgr. Dom Alberto Amaral, Bispo da Diocese Maliana, Encontro Equipa Kondemal, Halao Apelo kona ba moras Dengue liu husi TVTL, Halao encontro ho reprezentante enfremairos nain 3.
Partisipa iha ekontru nee Concelho Administrasaun Distritais, Concelho Administrasaun Administração Hospital Referencia Maliana no Estudante Medicina.
Dia 3 de Fevereiro de 2011
Ministru saude Dr. Nelson Martins, Halao encontro ho Concelho Administrasaun Distritais hodi hare kona ba lei/ Statuto nomos Outbreak Dengue ne’ebé hamosu bebe ida mate iha Encontro KONDEMAL , Rezultado husi encontro ne’e forma equipa Distrital ne’ebé lidera husi Administrador Distrito hodi involve Komunidade tomak inklui enstituisaun privado hodi halao limpeza geral iha Distrito ne’ebé refere. Dia 4 de Fevereiro de 2011Halao encontro ho Estudante Medicina hodi halo observação geral kona ba kondisaun estudo no acomodação. Husi encontro ne’e estudante medicina sira hatoo prekupasaun oi-oin nunee Ministru saude iha ninia intervensaun hateten prekupasaun sira ne’ebé agora dadaun estudante sira hatoo nee sei tau iha konsiderasaun no ministeriu saude sei buka meus atu rejolve lalais.

Iha parte seluk Ministru saude mos Halao encontro ho Mgr. Dom Alberto Amaral, Bispo da Diocese Maliana; Hodi hare kondição saúde Bispo nomos husu atu Igreija ko’opera besik liutan ho Saúde hodi hare kona ba moras HIV/SIDA nomos moras Dengue ne’ebé hamosu labarik ida mate iha Distrito Bobonaro. Hatan ba problemas hirak ne’e leader husi Egreija prontu nafatin atu ko’opera ho Ministério Saúde hodi buka dalan atu rezolve liu husi informasaun ne’ebé sei hato’o husi Igreija liu-liu aninsiu ba sarani sira wainhira participa missa iha loron bain-bain nomos Domingo. Halao encontro ho Concelho Administrasaun Hospital Referencia de Maliana,
hodi hare kona ba lei/Statuto nomos Outbreak Dengue ne’ebé hamosu bebe ida mate.
Lia menon ne’ebé hato’o husi S.E. Ministro Saúde
Husu ba Concelho Adminisração Saúde Distrital no Hospital da Referencia Maliana katak;
Tinan ida ne’e sai hanesan Ano do Recursus Humanus
Husu atu leader saude Distrito sira presiza kria comunicação ne’ebé diak entre Xefe no staff sira nomos passa informasaun ba malu.Husu atu knar nain Saúde sira serviço hamutuk hodi alcança objectivo ida atu nune’e responde ba nacissidade povo liu husi asistencia saúde ne’ebé qualidade diak.

Entre tantu ekipa ne’ebé akompanha Ministru saude mak; Gabinete Ministro Saúde, Gabinete Protocolo e Com. Social, Gabinete Ligasaun com Distrito, Xefe Departemento Logistic, Xefe Departemento SMI, Xefe Departemento Promoção e Educação Saúde, Xefe Departemento Ambiental, Xefe Departemento Farmacia MS01

MINISTERIU SAUDE HAMUTUK HO NIA ENTIDADES TOMAK PRONTU LUTA KONTRA MORAS, MALARIA,DENGE NO MORAS HIRAK NE’EBÉ AGORA DADAUN EJISTE IHA TIMOR LESTE

Ministerio Saude-semanal
Prezidente komisaun Nasional ba kontrola malaria no denge Kondemal Dr. Nelson Martins,MD,MHM,PhD hateten agora dadaun ministerio da saude esforsu atu hari KONDEMAL distrital hareba kondisaun mudansa klimatika ne’ebé kuaze tenpu udan naruk iha ita nia rain, impaktu husi mudansa klimatika nee bele kria moras oi-oin. Nunee moras ne’ebé fasil atu komunidade sira hetan mak Diarea, Malaria, Dengue, nunee Ministerio da sauide servisu makas atu fortika servisu KONDEMAL hodi luta hasoru moras hirak nee.
Alende nee Ministru Saude RDTL nee mos apelu ba komunidade tomak atu kuidadu ita nia saude hamos ita nia ambiente tanba realidade hatudu katak moras kazu denge ne’ebé akontese iha maliana aumenta bebeik husi loron ba loron nunee agora dadaun rejulta ita nia komunidade ida mate tanba moras Denge.
Relasiona ho moras ne’ebé sempre mosu iha tempo udan hanesan Malaria, Dengue, Diarea no isin katar, hodi afeta ba saude publiko, moras sira ne’e mosu tanba ita nian ambiente ne’ebé foer. Ho ida ne’e, Ministerio da saude hakarak fo hatene ba comunidade tomak atu:
1. Labele soe foer arbiru, foer tenke tau hamutuk ba soe iha fatin lisu ne’ebé perpara ona.
2. Wainhira toba tenke uja Moskateru
3. Hames be’e dalan, labele husik be’e nalihun no hamos uma ninin.
4. Fase liman molok atu han no depois de sintina.
Rezultado husi encontro ne’e forma equipa Distrital ne’ebé lidera husi Administrador Distrito hodi involve Komunidade tomak inklui enstituisaun privado hodi hala’o limpeza geral iha Distrito ne’ebé refere. MS01

Tuesday, February 08, 2011

Ministerio da saude Assina Nota intendementu hamutuk ho Marry Stopes Internasional




08 Fevereiru 2011

Dili, Saude Semanal, Ministério da Saúde nudar orgaun estadu responsavel ba estudu, konsepsaun, Regulamentasaun, Ezekusaun, Koordenasaun no avaliasaun politika Governo nian ne’ebe aprova ba seitor saúde hodi bele garante direito konstitusional sidadaun ba saúde.
Nune’e Ministério da Saúde alem de presta servisu saúde tenke regula no fo orientasaun ba esforsu oin-oin iha area saúde inklui seitor privadu ne’ebe sai nudar komplimentariu ba servisu nasional tuir rekezitus ne’ebe legalmente estabelese no kumpri prinsipius fundamentais ne’ebe mak nasaun ne’e adopta iha ninia politikas hodi lori benefisiu ba ninia sidadaun sira.
Marie Stopes International Timor-Leste ( MSITL ) nudar Organizasaun Naun-Governamental ida ne’ebe mak servisu iha fatin barak mundo ne’e, Sira mos iha sira nia baze servisu iha Dili-Timor Leste, Hodi hala’o servisu iha area saude. Servisu MSITL iha Dili inklui asistensia klinika, promosaun no prevensaun no enkaminhamentu iha area Saude Reproduktiva espesialmente ba Planeamentu Familia.
Dadus demografikus Saúde hatudu, Timor Leste nudar nasaun ho taxa fertilidade a’as 7,8 ( DHS 2003 ) no 5,7 ( 2009 ), ho porsaun populasaun idade foin sa’e liu 50 %, no prevalensia uzu kontraseptivus husi kaben-nain sira mantein menus to’o 2010 < 30 %. Problema ida ne’e nudar dezafiu ba Saude Reproduktiva, kuidados ba oan no problemas oin-oin ne’ebe mak afeita ba bem-estar familias sira no sira nia dezenvolvimentu sosial ekonomiku deszafia dezenvolvimentu nasaun ninian.
Ho situasaun nune’e iha Timor Leste, Ministério da Saúde sente importante atu hala’o kooperasaun ho Marie Stopes International, hodi bele fo benefisiu servisu ne’e ba ita nia povu, ho esperiensia servisu iha area reproduktiva ne’ebe diak tebes, liu husi Nota de Intendimento ida.
Nota Intendementu ida ne’e ( ne’ebe sei temi ho naran NI ) determina lala’ok servisu ne’ebe parte rua ne’e hala’o ( 1 ) Ministério da Saúde ( ne’ebe sei temi ho naran MdS ) Republica Democratica de Timor Leste, no ( 2 ) Marie Stopes International Timor-Leste ( ne’ebe sei temi ho MSITL ).
NI ida nee liu tiha ona husi diskusaun nebe klean entre parte rua ne’e, Involve ninia servisus teknikus sira, kona ba proposta ne’ebe aprezenta husi MSITL, no parte rua konkorda katak
“ Servisu iha Area Saude Reproduktiva “ ne’ebe hala’o iha Dili sei habelar iha Distrito sira seluk hanesan : Baucau, Ermera, Bobonaro, Viqueque, Ainaro, Manufahi no Lautem husi Janeiro 2011 - Janeiro 2012.

Mekanismu apoiu sira seluk tenke estabelese atu kria kondisaun nesesario iha distrito foun hirak ne’ebe MSITL atu ba, Hodi asegura apoiu implementasaun ne’ebe diak no ikus mai bele benefisia populasaun ne’eba hanesan kontabilidade ba razaun tamba sa NI ne’e estabelese.
Servisu Saude Reproduktiva ne’ebe sei oferese iha fatin hotu-hotu ne’ebe mak temi ona iha leten sei iha natureza hanesan tuir mai ne’e :
Servisu iha Distritu Dili, sei hala’o iha Klinika MSITL no iha fatin sira seluk iha Dili laran, alem aktividades promosaun kona ba Saúde Reproduktiva sei hala’o Servisus Kliniku iha area Saúde Reproduktiva tuir lista ne’ebe sei deskreve iha lista, aneksu.
Servisu ne’ebe sei habelar ba iha Distrito Baucau, Ermera, Bobonaro, Viqueque, Ainaro, Manufahi no Lautem, sei hala’o kona ba Promosaun da Saúde no Enkaminhamentu klientes ba kuidados Saúde Reproduktiva no Planeamento Familiar deit, no sei liu husi :
Servisu Integrado Saude Comunitaria (SISCa) iha suku hotu-hotu iha distrito ne’ebe refere, nudar komitmentu atu hadia kualidade implementasaun SISCa ho orario fulan ida dala ida.
Servisus Clinicas Móveis, husi MSITL sira ba fatin ne’ebe remotas liu, ne’ebe seidauk kobre husi programa SISCa.
Encaminhamentu klientes atu hetan asistensia ba Saúde Reproduktiva.
Servisu ne’ebe hala’o iha distrito sira sei hala’o ho gratuitu.
1. Ministério da Saúde

MdS iha responsabilidade no komitmentu atu fo apoiu hanesan tuir mai ne’e:
a. Halo akompanhamentu ba servisu nebe MSITL hala’o tuir Nota Intendimentu.
b. Liu husi area Centro Saude ne’ebe mak MSITL hala’o servisu, Ministério da Saúde sei fo atendimento ba nesesidade produktus kontraseptivus no nesesidade seluk Saúde Reproduktiva ne’ebe mak MSITL enkaminha.
c. Fo apoiu tekniku atu asegura kualidade servisu, inklui fo treinamentu ba pessoal MSITL.
d. Hospital Referencia no Diresaun Servisus Saude Distritais sei fo apoiu ambulansias se karik iha kazu emerjensia ne’ebe presiza atu halo enkaminhamentu urgenti.
e. Fo apoiu necessariu iha situasaun epidemia.
f. Fasilita MSITL, inklui fo informasaun kona ba servisu MSITL iha asuntus ne’ebe iha relasaun ho doadores sira.

2. Marie Stopes International Timor-Leste

MSITL simu responsabilidade no konkorda atu implementa pontus hirak tuir mai ne’e:
a. MSITL sei buka hala’o servisu tuir espiritu ne’ebe hakerek iha Nota Intendimento ne’e.
b. Sei aplika padraun eh protokolu Ministério da Saúde ba servisu klinikus relevantes ba area Saúde Reproduktiva
c. Uza materias promosaun no edukasaun ne’ebe Ministério da Saúde dezenvolve ba Saúde Reproduktiva.
d. Hala’o koordenasaun no konsultasaun ho parte relevantes iha Ministério da Saúde iha dezenvolvimento materiais ba Promosaun Saúde ou servisu seluk ne’ebe relevante ba area Saúde Reproduktiva.
e. Halo relatorio mensal ne’ebe kompostu husi: Relatorio Progresu relasiona ho Implementasaun Programa ne’ebe anexu ho konta responsabilidade uza orsamentu depois diriji mai Servisu Centrais Ministério da Saúde no kopia ba Servisu Saúde Distritu.
f. Fornese dadus kada fulan liu husi prence formatu Sistema Informasaun Saúde
g. Hala’o inkontru regular tuir programa Servisu Saúde Distritu no inkontru ruma ne’ebe hala’o iha nivel nasional karik persija.
h. Koordena ho hospital referensia sira relasiona sistema enkaminhamentu no karik iha situasaun epidemia.
i. Koordena no konsulta ho Servisu Centrais Ministério da Saúde no Servisu Saude Distrito iha implementasaun programa ho actividades.
j. Bainhira hala’o treinamento ka orientasaun ba instituisaun ruma ( PNTL, FDTL, Universidade, no Organizasaun seluk ) tenki konsulta ho Departemento relevante iha Ministério da Saúde, Servisu Saúde Distrito, no Instituto de Ciensias de Saúde.

Parte rua sei negosia prosesu extensaun aktividades adisional relevante ruma ne’ebe mosu durante implementasaun NI ida ne’e.

Marka prezensa iha ceremonia Assina Nota Intendementu ne’e Mak Direktor Geral Ministerio da saude Agapito da Silva Soares, Country Direktora MSITL, Melinda Mousaco, Xefe Departamentus, Media inklui mos staff relevante balun Msoo3

Tuesday, February 01, 2011

“Delegasaun Timor-Leste, lidera husi S.E. Vise-Ministra Saúde, RDTL partisipa iha Enkontru PBAC ba dala 13 no EB ba dala 128, husi loron 13 – 26 Jane


Enkontru kona-ba Programme Budget and Administration Committee of the Executive Board ba dala 13 no Executive Board ba dala 128 hala’o hahú husi loron 13 to’o 26 Janeiru tinan 2011 iha Salaun boot Executive Board nian, Organizasaun Mundial Saúde, Geneva, Suisa.
Executive Board ne’e kompostu husi nasaun 34, ne’ebé reprezenta husi nasaun ida-idak husi Ministru Saúde ka Vise-Ministru/a Saúde ka Diretor-Jeral Saúde ka Diretor balun. Husi Rejiaun Sudeste Aziátiku, nasaun tolu maka reprezenta hanesan: Bangladesh, India no Timor-Leste. Timor-Leste ba dala uluk maka sai nu’udar membru Executve Board hahú husi tinan 2010 – 2013. S.E. Vise-Ministra Saúde, RDTL maka eleitu nu’udar membru Executive Board ba Timor-Leste nian.
Iha enkontru Executive Board ne’e, husi Delegasaun Timor-Leste lidera diretamente husi S.E. Vise-Minitra Saúde ho nia membru alternate no Advisor sira.
Executive Board ne’e hala’o enkontru tinan ida dala rua, enkontru importante hala’o iha fulan Janeiru, no enkontru badak hala’o iha fulan Maiu, depoisde Asembleia Mundial Saúde iha Geneva.
Objetivu ba Enkontru Executive Board maka atu:
1. Asegura katak Estadu Membru/Membru Executive Board sira hotu atu tau iha konsiderasaun asuntu/kestaun xave saúde nian sira-ne’ebé afeta ka influensia Rejiaun 6 (Afrika, Amerika, Sudeste-Aziátiku, Europa, Mediterráneu Oriental no Pasífiku Osidental) no hatene informasaun kompletu kona-ba asuntu sira-ne’e;
2. Fornese plataforma ida hodi dezenvolve konsensu ida ba unifikasaun ba item relevante saúde nian tuir ajenda “ordem do dia” iha Rejiaun 6 ne’e;
3. Fó efeitu ba desizaun no polítika sira iha Asembleia Mundial Saúde nian;
4. Atu akonsella;
5. Fasilita ninia servisu; no
6. Aprova Rezolusaun sira
Iha Enkontru ba Programme Budget and Administraton Commission ba dala 13 ne’e ko’alia no diskute liu ba area importante tolu maka hanesan:
1. Diresaun estratéjiku kona-ba Reforma Jestaun iha Organizasaun Mundial Saúde nian
2. Materia ba revizaun ho rekomendasaun kona-ba Planu, Orsamentu no Rekursus Umanus iha Organizasaun Mundial Saúde nian
3. Auditoria no asuntu seluk nu’udar informasaun
Iha Enkontru ba Executive Board ba dala 128 maka kobre aspetu temátika hanesan tuir mai ne’e:
1. Relatoriu kona-ba Programme. Budget and Administration Commission of the Executive Board, Orsamentu ba OMS, Futuru finansiamentu ba OMS, Rekursus Umanus no Asuntu ba Eleisaun Diretor-Jeral OMS nian ne’ebé debate maka’as tebes iha EB ida-ne’e.
2. Aspetu Tékniku ne’ebé relasiona ho saúde global no presiza atu tau atensaun no iha kazu balun emerjensia hanesan: Meta Dezenvolvimentu Milieniu ne’ebé relasiona ho saúde (MDGs 1,4,5 no 6), Regulamentu Saúde International, Prevensaun ba Moras/Kanek ba Labarik Sira, Imunizasaun Global, Eradikasaun ba Moras Kontajiosa sira inklui pandemia no Moras La’os Kontajioza ne’ebé sai ameasa ba Estadu Membru Rejiaun neen (6) ne’e.
3. Draft ba Rezolusaun sira ne’ebé hetan aprovasaun no ida-ne’ebé sei presiza hadi’a
Delegasaun Timor-Leste, ne’ebé lidera husi S.E. Vise-Ministra Saúde partisipa ativamente no fó ninia deklarasaun no intervensaun barak ba aspetu saúde nian ne’ebé iha influensia no impaktu rejional (SEAR) no lokal, liu liu ba Timor-Leste. Iha Draft ba rezolusaun balun ne’ebé Timor-Leste ho maka’as tebes hala’o intervensaun no halo amendment. Timor-Leste mos husu nafatin Apoiu Tekniku, Dezenvolvimentu no Jestaun ba Rekursus Umanus no Hametin Sistema Saúde. Timor-Leste mos ho estadu membru balun hanesan: Bangladesh, Barbados, Brasil, Canada, China, Oman no Estdadus Unidos Amerika propoin Draft rezolusaun kona-ba “Child Injury Prevention”, ne’ebé diskute, iha amendment balun, maibe ikus mai aprova ho unanimidade.
Timor-Leste mós ho previlejiu hetan konvite atu tuir enkontru iha fulan Marsu, iha Russia kona-ba topiku ne’ebé foti no debate iha EB maka “ROAD SAFETY”.
Aleinde partisipa ativamente iha Enkontru PBAC ba dala 13 no EB ba dala 128, Delegasaun Timor-Leste mós iha opportunidade hodi hala’o enkontru extroardinariu ho Diresaun no Departamentu Relevante balun iha OMS no mos Organnizasaun professional balun hodi buka apoiu liu liu iha area Dezenvolvimentu Rekursus Umanus no Hametin Sistema Saúde hodi nune’e Timor-Leste bele alkansa MDGs ne’ebé trasa ona tuir Planu Dezenvolvimentu Nasional, RDTL. Husi enkontru ne’e Timor-Leste mós hetan apoiu ba “Biblioteca Azul/Blue Library” ne’ebé iha tempu badak OMS Geneva sei haruka mai Ministériu Saúde, Timor-Leste.
Depoisde enkontru ida-ne’e, Ministériu Saúde hodi haree no kaer ba Rezolusaun sira-ne’ebe aprovadu iha EB sei tau tuir prioridade hodi nune’e bele hahú hala’o koordenasaun ho diresaun/departamentu/gabinete relevante hodi kria polítika, estratejia, programa, mekanismu no ninia implementasaun.
Ikus liu maka Timor-Leste sei partisipa fila fali Enkontru Asembleia Mundial Saúde iha fulan Maiu 2011 no hanesan Membru Executive Board to’o tinan 2013.MS002