Vise-Ministra Saúde, Ana Isabel Soares, renova ona akordu kooperasaun
ne’ebé iha relasaun ho serbisu Brigada Médika Xineza, ho reprezentante
Embaixadór Xina nian ba Timor-Leste, Fu Yuancong. Akordu ne’e asina ona iha
loron 23 fulan-janeiru tinan 2017, iha Ministériu Saúde, iha Kaikoli, Dili.
Vise-Ministra fó hanoin katak
akordu ne’e hala’o kedas iha tempu Governu Konstitusionál II nian no, kada
tinan rua, halo renovasaun ho ajuste ne’ebé nesesáriu. Embaixada Xina ajuda
tebes Timor-Leste, liuhusi akordu ne’e, tanba sempre halo renovasaun ba ekipa
médika ne’ebé fó apoiu iha Óspital Nasionál Guido Valadares (ONGV), aleinde ida
ne’e haruka mós medikamentu no ekipamentu médiku sira.
Ana Isabel Soares informa ona
katak ita iha ona profisionál balu halo ne’ebé hela estudu espesialidade nian
iha Xina, durante fulan balu. Brigada Médika Xineza foun ne’e kompostu husi ema
na’in 12, feto 6 no mane 6. Sira sei ba serbisu iha área oinoin, liuliu área
Anestezia, Kardiolojia no Urolojia. Aleinde pesoál médiku, sira lori mós
tradutór ida no te’in-na’in (koziñeiru) ida. Kooperasaun xineza fó ona apoiu
iha konstrusaun ba dormitóriu ida ho andár rua, iha Bidau, atu nune’e pesoál
Brigada nian hela besik óspital no bele halo atendimentu di’ak liu ida ba
komunidade.
Vise-Ministra aproveita biban
ne’e atu rekoñese katak presiza haluan Óspital Nasionál Guido Valadares, atu
bele fó fatin di’ak liu ba pasiente sira no permite atendimentu dia’k liu ida
husi pesoál Saúde nian.
Vise-Ministra husu ba família
sira, karik bele, akompañamentu pasiente internadu sira atu limita ba ema na’in
ida ba moras-na’in ida, atu la inkomoda pasiente sira seluk nia deskansa,
nune’e sira sei bele rekupera ho lais.
Partisipa mós iha eventu ne’e Diretora-Jerál
Prestasaun Servisu nian, Odete Viegas, no Diretór Ezekutivu ONGV, José António
Gusmão.MS-002
No comments:
Post a Comment