Monday, July 04, 2011

TIMOR-VITA SIRKULA ONA IHA DISTRITU 7

Ministériu Saúde liuhusi Departamentu Nurtrisaun responde programa suplementu hahan ba labarik sira iha distritu 7 iha Timor laran hodi reduz malnutrisaun ba labarik sira. Xefi Departamentu Nutrisaun MS (MS) Dircea Maria Soares segunda(21/02) iha serbisu fatin hatete depois halo tiha lansamentu ba Timor-Vita iha Railaco, Sub-distritu Cleno, distritu Ermera 27 Maiu tinan kotuk implementa ona iha distritu 7.
           
            Xefi Dirce hatutan komesa husi lansamentu Timor-Vita 27 Maiu 2010 kotuk to’o data resente, Timor-Vita implementa ona iha distritu 7 hanesan distritu Ermera, Aileu, Oe-cusse, Dili, Manufahi, Lautem no Liquiça. Ditritu seluk sei uja nafatin suplementu hahan batar-ut produtu uluk ninian ne’ebé husi rai-li’ur, tanba haree husi kuantidade produsaun Timor-Vita iha railaran. Iha tempu badak sei distribui ba distritu hotu.
            Timor-vita kada loron produz 6-7 tonelada ba distritu 7 ne’e. Produtu ne’ebé mak inklui iha Timor-Vita nia laran mak hanesan, fore keli, batar, masimidar, mina, premix ka vitamina ne’ebé ho mineral ho konteudu nutrisaun aas.
            Timor-Vita produz ba labarik husi fulan 6 to’o fulan 59, ba labarik husi idade fulan 6 to’o fulan 23, sei fahe hotu Timor-Vita ne’ebé mak ba asesu iha sentru saúde ka ba iha SISCa, iha ne’eba sei iha mos ligasaun jestaun ne’ebé mak bele organiza sira oinsa bele hetan Timor-Vita. Ba labarik liuhusi fulan 24 MS sei tau nafatin kriteria ida hodi sukat sira nia liman kabun haree wainhira sira nia liman kabun menus husi 23,5 centimu sira sei hetan pakote Timor-Vita, nune’e mos ba inan isin rua sira ne’ebé liman kabun menus husi sentimu 23, no ba inan fo susu sira ne’ebé mak sira nia oan idade menus husi fulan 6 mai kraik.
            “Pakote Timor-Vita ne’e programa prioridade liu ba prevensaun labarik ho inan sira, tanba ita haree katak moras no mate ne’e akontese barak liu ba inan ho oan sira entaun prioridade ne’e mos ba inan ho oan sira maibe relasaun ho moras sira seluk hanesan moras TBC, HIV/SIDA, Lepra no moras sira seluk iha pusiblidade mos maka MS ajuda liliu departamentu nutrisaun puriezemplu foin lalais iha mos ajuda oituan husi WFP, ami fahe pakote biscuit PB5. Ida ne’e hanesan ajudu ida deit depois tinan kotuk mos ami fahe susu been ba moras sira ne’e no agora ami hanoin ba oin katak diak liliu ne’e ba moras sira ne’ebé maka ha’u temi diak liu utiliza ita nia hahan rasik tanba hahan ne’ebé iha nutrient ne’e kompletu para atu bele hadia moras sira nia saude fila fali”, informa Xefi Dirce.
            Nia salienta liutan: “Hau hakarak hato’o katak programa suplementu hahan ne’e la’os para kombate kedas malnutrisaun lae, ida ne’e atu responde de’it ba kurtu prazu hodi haree de’it ba labarik sira labele moras, mantein labarik sira nia imunidade para sira labele moras, atu nune’e sira labele monu liu ba iha malnutrisaun ne’ebé mais grave.”
            Tuir planu MS liuhusi departamentu relevante ne’e, sei buka posibilidade ba produtu sira seluk tanba agora dadauk ita rai laran mos produz hela ho NGO balun hodi halo hela Guri-Guri Gizi, ho mos Mini Virgin Cocoanut Oil. Produtu ne’e implementa iha distritu Manatuto ho Viqueque. Timor-Vita sei hetan iha fasilidade saúde hotu-hotu iha Timor laran tomak. Iha distritu 7 utiliza Timor-Vita, distritu 2 (Manatuto ho Vique-que) utiliza Guri-Guri Gizi ho mos Mini Virgin Cocoanut Oil, no distritu 3 (Ainaro, Bobonaro ho Baucau) uja batar-ut. Departamentu Nutrisaun sempre kontrola kualidade batar no forekeli ne’ebé sirkula iha railaran atu bele uza produz Timor-Vita.           
            “Ikus liu ha’u hakarak apela mos ba iha inan sira hotu katak agora dadauk iha fulan febreiru halo mos distribuisaun kona ba vitamina A, tanba fulan ne’e espesiál ba Vitamina A ninian tanba vitamina A ajuda labarik sira nia imunidade isin ninian, hadok sira husi moras matan no tulun mos iha kresementu tanba ne’e mak programa ida ne’e, programa importante tebe-tebes ita bolu katak selain sira hetan hahan suplementu, aimoruk lumbriga atu sira hetan kedas prevensaun kada fulan 6 hadok-an husi moras.**

No comments: