Vice MNE Cuba Hala’o Vizita Loron Ida Iha Hospital Referal Baucau
Vise Ministra dos Negocio Estrangeiro Cuba Dra. Jilia Zimenes halao vizita loron ida iha Hospital Referal Baucau hodi hare husi besik liu kondisaun Doutor Cubano sira nebe halao nia knar iha hospital Referal Baucau.
Oportunidade ne'e Vice Ministra dos Negocios Estrageru Cuba halao vizita ba sala enfermaria hospital Baucau, vizita fatin eskola estudante Medicina iha eis SPK Baucau, no rezidensia Doutor Cubano sira nia.
Molok halao vizita ba fatin hirak ne'e Vise Ministra hato’o nia diskurso badak, nebe dehan “Hau simu tais nebe tara mai hau hanesan simbolo ida amizade,I sai mos hanesan honra ida ba povo Cubano. Hau hakarak hateten katak razaun servisu nebe medico sira husi cuba halao no sei halao nafatin hanesan profeita. prosesu ida nebe hametin diak liu ba tan oin. Tanba kolaborador sira husi teknika atu hametin liu tan servisu.
Vise Ministra hatutan tan katak hare husi geografikamente ita do’ok la halimar, maibe iha sentidu koperasaun Timor leste ho Cuba hamutuk hodi dezenvolve liu ba oin. Nia mos husu obrigado ba medico Timor no medico cubano sira iha timor leste tanba bele simu nia ho diak hanesan iha nia rain rasik.
Iha farin hanesan Direitor hospital Referal Baucau Dr. Celestino Rego hateten katak momentu especial ne’e hodi hamutuk ita celebra loron nasional juventude Lorico assuwain nian, aumesmo tempo komemora loron insidenti 12 Novembro nebe fo hanoin hikas ba ita tinan 17 liu ba, nebe ita nia asuwain sira dedika sira nia moris tomak ba povo no nasaun ida ne’e.
Nia mos hatutan Governo Timor leste hatudu nia seriedade no komitmento hodi mantein relasaun no koperasaun diak entre pais rua.
“Ho laran ksolok hau hakarak dehan katak ami hetan Brigada Cubana nebe professional no dedikasaun bo’ot tebes ba sira nia servisu katak dedikasaun ba ami nia povo no nasaun ida ne’e. Tanba sira la hatene loron no kalan pronto, despunivel ba perzisa moras nian ho hospital nian, tanba sira halao buat hotu dehan sim, sim duni. Ne’e exemplo bo’ot ida mai ami professional saude timor oan hodi banati tuir, nafatin dehan sim hodi servi povo no nasaun doben ne’e, hanesan ami nia joven lorico assuwain halo ona iha tinan 17 liu ba, pronto nafatin mesmu saran sira nia an to’o mate” nia sublinha.
Direitor ne'e mos informa ba Vise Ministra Negosio Estrangeiro katak hospital referral Baucau hanesan hospital nebe bo’ot numero 2 iha nasaun ne’e, hodi simu moras husi distrito Lospalos, Vikeke, no distrito Baucau rasik,maibe sai hanesan dezafio bo’ot ida mai ami. Katak hare ba limitasoens rekursus, liu-liu rekursus humanus.
Iha oportunidade ne’e mos direitor hospital referral Baucau husu ba Ministra atu fo tulun nafatin no suporta nafatin to’o bainhira ami hatene ona no bele dehan sim ba povo no nasaun doben ida ne’e.
Iha tempo hanesan direitor Edukasaun regiao 1 Carlos Freitas aprecia teb-tebes ho prezensa Ministra Negosio Estrangeiro Cuba nian, tanba liu husi koperasaun governo Timor-leste ho governo Cuba lori foin sae timor oan sira atu bele hetan edukasaun iha area medicina nian no area sira seluk nebe iha.
Nia mos sugere ba Ministra labele loke eskola medicina nian iha distrito Dili ho Baucau deit, maibe se’e bele loke mos iha distrito 11 seluk nebe seidauk loke eskola medicina nian ho mos parte edukasaun nian seluk konaba Analfabetiza atu nune’e to’o tinan 2015, ema hotu iha timor bele ona hotu-hotu hakerek no le’e.
Husi sorin seluk Direitor Emfarmagen hospital Referal Baucau Reinaldo Belo informa katak Doutor Cubano nebe oras ne’e dadauk halao servisu iha hospital refere hamutuk ema nain 24, I entre sira nain 24 ne’e halao servisu medica nian iha area Medicina Geral Especialidade, Bioq. Clinica, Neonatologia, Pediatria, Medicina Interna, Cirugia, Drmatologia, Ortopedia, Anestesionlogia, Ginecobstetricia, Enfermeria, magenologia , Estomalogia, Farmacia, Estadistica, Rehabilitacion Fisica no Laboratorio Clinica.
Hola parte iha vizita ne’e maka Ministra ho nia komitiva, Embaixador Cuba nian iha Timor-Leste, Reprezentante MNEC Timor-Leste Leonildo da Costa, direitor hospital ho nia staf sira, Xefe Saude distrito Baucau ho nia staf, Komandante primeiro batalyon F-FDTL Maijor Maubuti, komandante Interino PNTL, komanadante UIR, Administrador Interino Baucau, doutor cubano, xefe do suco no xefe departamento balun, inklui populasaun balun ema besik atus ida.(FG)
Estudante Medicina Timor Oan Nain 704 Halao Estudo Iha Cuba
Sira Nebe Quinto Ano Sei Fila Setembro 2009.
Reprezentante Ministru Negosio Estrangeiro e Coperasaun Timor-Leste Leonildo da Costa hateten katak estudante medicina Timor oan nebe oras ne’e dadauk halao sira nia estudo iha nasaun Cuba hamutuk ema nain 704.
“Agora estudante Timor oan nebe iha nasaun Cuba hamutuk 704 estudante, engeral estudante hirak ne’e medicina maka barak liu kuaze 648 ida hanesan ne’e, medicina geral, I ita agora iha 13 teknika saude, klinika, laboratorium klinika ho sira selu-seluk tan. Ita iha Psikologia ida, doutor matan nian ida, depois agora dadauk iha fulan kotuk liu ba haruka tan estudante nain 4 husi disportu, I ninia especialidade ne’e mak treinador ba boxing, treinador ba bola, treinador ba taekondo, entaun ita nia koperasaun Cuba, liu-liu iha area edukasaun ho Saude prezentimente lao hanesan ne’e” dehan Leonildo ba Jornal Nacional Diario Kuarta (12/11) iha hospital Referral Baucau
Nia informa katak estudante hirak ne’e iha klasifikasaun, hanesan balun iha Primeiro ano, Segundo ano, terseiro ano, quarto ano no quinto ano. I sira nebe iha quinto ano, tuir planu Setembro 2009 fila mai sira nia finalisa Sesto ano iha timor.
Leonildo informa katak estudante sira nia kondisaun engeral iha Cuba diak tanba durante tinan 2 nia laran nia parte halo akompainyamento sira nia aproveitamento 100%, komparasaun ho 117 pais, no aktividade ekstrakurikuler lao diak, vida religioza mos lao diak. Tanba fatin sira nebe maka la iha padre sira halo aproximasaun ho padre sira hodi halo missa iha loron Sabado.
Nia akrezenta katak estudante nebe sei fila mai iha fulan Setembro hamutuk 18, entre sira nain 18 ne'e sira nebe hetan valor diak, estadu sei kontinua suporta hodi haruka fila fali ba nasaun Cuba hodi hasai tan sira nia especialidade. I halo troco de sesto ano, katak estudante timor oan nebe tuir eskola medicina iha timor leste bainhira to’o Quinto ano ba aba Sesto ano iha nasaun Cuba no sira nebe Sesto ano iha Cuba mai akava iha timor.
“ Razaun maka ne'e tanba sira iha neba la koinese moras sira nebe iha ita nia rain, entaun sira nebe iha Sesto ano fila fali mai iha ne’e atu koinese moras iha timor. Agora sira nebe estuda hela iha timor sira la koinese moras sira nebe iha Cuba, entaun sira atu aumenta tan sira nia koinesimento no akava sira nia Sesto ano iha nasaun Cuba. Tenik Nia
Reprezentante MNEC Timor-Leste ne’e informa tan katak ho vizita Ministra Negocio estrangeiro Cuba nian mai iha ne’e governo Timor-Leste halo asina akordu lubuk ida iha area bar-barak, hanesan area Agrikultura, Edukasaun no mos areia sira seluk tan.FG-MS01
No comments:
Post a Comment