Vise-Ministra Saúde, Dra. Ana Isabel Soares asina ona akordu kooperasaun
ida kona-ba programa nutrisaun integradu, ho Embaixadór Uniaun Europeia nian,
Alexandre Leitão. Serimónia ne’e hala’o iha salaun Ministériu Saúde, Kaikoli
Dili, iha loron 20 fulan- janeiru tinan 2017.
Vise-Ministra Saúde ne’e,
hateten katak, ida ne’e hanesan apoiu orsamentu ba daruak nian ona hosi
Embaixada Uniaun Europeia ba Ministériu Saúde. Orsamentu ne’e entrega ona liuhusi
parseiru UNICEF (sigla iha lia-inglés Fundu Nasoins Unidas nian ba Labarik
sira) no Programa Alimentár Mundiál. Programa sira ne’ebé define ona husi
Ministériu ka hamutuk ho parseiru Nasoins Unidas nian sira ne’ebé fó apoiu ba
Governu Timor-Leste iha aspetu tékniku sira hanesan Saúde Públika, ho osan
ne’ebé sira simu ona hosi Uniaun Europeia destinadu atu hodi dezenvolve
programa hirak ne’e.
Dra. Ana Isabel Soares,
hateten ona katak Embaixada Uniaun Europeia nian entrega ona ba UNICEF hamutuk
euro miliaun 1.32 no ba WFP (World Food Programme) euro millaun 720.000.
Osan
sira ne’e uza hodi tulun Governu atu hamenus nutrisaun ne’ebé ladi’ak ba
labarik sira ho tinan lima mai kraik, ba inan isin-rua no inan sira ne’ebé sei
fó susu oan sira iha territóriu hotu Timor-Leste nian.
Vise Ministru ne’e fó hanoin
ona katak labarik sira maka futuru nasaun nian, no ida ne’e presiza fó atensaun
ba prioridade sira iha área moris nasionál nian ida-idak, tanba Timor-Leste iha
prosesu dezenvolvimentu ida ne’ebé área sira hotu iha sira-nia prioridade,
hanesan akontese daudaun ho Ministériu Saúde.
Vise-Ministra mós informa ona
katak husi estudu estatístika ne’ebé hala’o ona iha ita-nia rain kona-ba
nutrisaun ladi’ak hatudu katak ita persiza duni hadi’a situasaun ida ne’e, atu
nune’e labarik sira bele moris ho saudavel no fó rendimentu ne’ebé di’ak iha
futuru hodi hala’o sira nia estudu ba dezenvolvimentu Timor-Leste nian.MS-002
No comments:
Post a Comment