“TRABALHADORES SAMES EZIJI SIRA NIA ESTATUTU”

Trabalhadores servisu autonomu medikamentus no ekipamentus saude SAMES total hamutuk 47 pesoas eziji ba governu atu define lolos estatutu SAMES nian.

Trabalhador nebe haknaar aan durante tinan sanulu resin ona husu ba governu atu define no justifika lolos sira nia estatutu tuir rejolusaun governu nebe fo sai iha jornal da republika No. 44/2010, loron 17 de Novembru.

Bruno Tavares nudar portavos hateten, SAMES nia funsaun mak sosa aimoruk, rai aimoruk no distribui aimoruk no ekipamentus saude fasilidade saude sira nebe naklekar iha teritoriu laran tomak.

Ejijensia mak hanesan, durante tinan 10 nia laran sira trabalhadores fo ona sira nia dedikasaun nasionalizmu tomak hodi kontribui ba povu no nasaun nee liu husi ministeriu saude nia mahon tan nee husu ba Governu RDTL  atu define klaru estatutu SAMES nian.

Bruno tavares esplika trabalhadores SAMES servi povu no nasaun ida nee lori tinan sanulu resin ona, maibe too agora seidauk define lolos trabalhadores sira nia estate.

Iha sorin seluk sira mos ejiji ba Parlamentu Nasional hodi hare fila fali lei emprensa publika hodi nunee bele define sira nia estatutu no funsaun.

Iha oportunidade nee Tavares husu ba administrasaun SAMES atu fo kontratu permanente no hadia lalais nivel salarial nebe mak funsaun publika aplika ba funsionariu estadu nian.

Husu ba governu atu fo mos garantia de vida ba funsionariu SAMES, wainhira halo servisu mak hetan dezastre iha oras servisu nia laran.

Maske ho asaun petisaun ejijensia nee halao maibe trabalhadores  sira kontinua halao sira nia servisu hanesan bain-bain no petisaun nee sira hatoo ona ba Primeru Ministru, Prezidenti parlamentu Nasional, Minstru saude no Direktor Geral SAMES. SAUDESEMANAL

Bazeia ba IHR 2005 MS Implementa Portu Saude iha Pontu Estrada Railaran

Ministériu Saude realiza workshop ho intensaun atu implementa Portu Saude iha pontu estrada bazeia ba Internasionál Health Regularations (IHR) 2005.

            “Importansia husi workshop ne’e atu fo hanoin ba Regulamentu Internasionál Saude 2005 ne’ebé hahú halo nia revizaun depois adopta iha 2005”, informa Duarte Ximenes, reprezentante Ministru Saude, ba públiku iha workshop konaba implementasaun Portu Saude iha Pontu Estrada iha railaran, iha salaun Delta Nova Tersa 10 Maiu  2011.

            Ximenes esklarese katak uluk kedas iha ona regulasaun internasionál adopta rezolusaun ba rezolusaun Asembleia Mundiál Saude ba dala 48, no adopta bazeia ba situasaun risku saude públiku nune’e TL adopta regulamentu internasionál foun ho naran Internasionál Health Regulations 2005 no aprova liuhusi Rezolusaun Asembelia Mundiál Saude ba dala 58.

            “Iha rezolusaun ne’e obrigasaun nasaun hotu inklui TL ne’ebé tenki halo hodi apoiu saude mundiál iha tinan 2010 ne’e ho apoiu WICO ita hahú implementa Internasionál Health Regulations medidas implementasaun sei aprezenta husi Konsellu Diresaun MS wanhira sente importante”, afirma Ximenes.

            Nia hatutan katak importante mak hadi’a sistema laboratórium, hadi’a sistema vijilansia moras, sistema informasaun no ekipamentus iha fatin ne’ebé dezignadu hodi hola medidas ne’ebé mak foti bazeadu ba lei.

            Iha fatin hanesan reprezentante OMS ba TL, Dra.Paramitha Sudharto hatete IHR i importante atu haree ba moras ne’ebé hada’et husi nasaun ida ba nasaun seluk hanesan flu burung ne’ebé akontese iha rai bara-barak. Presensa turista sira iha tempu moras ne’e bele hada’et kedas ba seluk hanesan Xina no Hongkong da’et ba to’o Canadá no Indonesia hodi hamate ema barak. Liuhusi akontesementu hirak ne’e OMS foti desizaun hamósu IHR nu’udar resposta ba moras hada’et ne’ebé ameasa dadauk ema nia vida umanu iha mundu ho interaksaun imediata.

            Entertantu xefe Departamentu CDC Carlito C. Freitas hatete nasaun hirak ne’ebé sai hanesan membru IHR iha dever obrigasaun atu implementa programa harii seguransa saude públiku internasionál no tau matan nafatin ba impaktu saude públiku. Nune’e objetivu implementasaun Portu Saude iha Pontus estradas atu hapara ka prevene moras hada’et internasionál liuhusi meius transporte ne’ebé liu husi aviazaun marítima no viajen terrestre.

            Salvadór nu’udar IHR office ba WHO (OMS) hatete, estabelesimentu Portu Saude iha Pontus estradas iha TL hanesan unidade ida ne’ebé harii’i iha MS nia okos 2011 hetan suporta tékniku husi OMS ho MS.**

Ministru Martins: “SISCa Hetan Fatin Espesiál iha Komunidade”

Serviços Integrados da Saúde Comunitária (SISCa) ne’ebé hahú hala’o nia programa desde 2008 to’o oras ne’e komesa hetan fatin ne’ebé especial iha komunidade nia leet.

            “Ita haree programa SISCa ne’ebé komesa hala’o iha 2008 hetan partisipasaun maka’as husi komunidade, sira mak deside rasik sira nia an hanesan lideransa saude hodi sai parseiru administradór sira iha distrito nune’e mós hamutuk deside SISCa”, expresa Ministru Saude Martins iha salaun Dili Convention Center (eis merkadu lama).

            Ministru Martins hatutan programa SISCa hahú tama iha sisema saude 2008, oras ne’e komesa to’o iha postu saude ho atividade ida ne’ebé iha valor tuir saida mak hakerek ona iha konstituisaun RDTL. SISCa fiar no uja dadus real ba planu, la bazeia ba estimasaun oin-oin, tamba Timor-Leste nasaun ki’ik estimasaun dala barak falla, ne’eduni SISCa nu’udar solusaun ba iha problema lokál maske dala barak bele uja pratika estandar internasionál hanesan sasukat.

            Ministru Martins esklarese elementu funsionál nu’udar baze dadus rejista familiár iha suku. Tuir  survey ne’ebé halo iha suku sira hotu hatudu katak problema saida mak komunidade sira infrenta depois fulan-fulan implementa programa asistensia saude.

            “Iha meja 6 ne’ebé mak SISCa iha, ita haree katak iha rejistu saude familiár tenki halo duni tamba ameasa hanesan dezafiu ne’ebé mak ministériu saude hasoru, nune’e mós partisipasaun komunidade nian, MS tenki rejistu uma kain ida-idak hodi sura labarik kada uma kain hira, katuas ferik hira kondisaun oinsa, moras TBC ho Lepra hira”, klaru Ministru Martins.**

TBC Sai Problema Saude Públiku

Ministériu Saude (MS) konsidera moras Tuberkulosis (TBC) hanesan problema seriu ba saude públiku, maske komesa hatudu reduzaun ida signifikante tebes durante tinan hirak ne’e.

            “Ita atu hatene deit katak, moras TBC sei nafatin problema saude públiku iha ita nia rai maski tinan-tinan iha redusaun maka’as”, hatete Ministru Martins ba Revista TALITI iha nia kna’ar fatin MS Caicoli Dili, Tersa 24 Maiu 2011.

            Alende moras TBC, moras Malaria sai mós preukupasaun MS nian, maski hetan númeru maka’as presija estratejia reduz moras ne’e iha futuru. “Hanesan saude públiku tenki deklara eliminasaun mais esforsu ita haree katak iha tinan hirak nia laran ne’e ita konsege ona reduz mais metade sei problema nafatin”, tenik Ministru Martins.

            Ministru Martins informa liutan katak MS identifika ikus-ikus ne’e problema moras sarampo. Eepidemia moras ne’e mósu iha rai Eropa no Amérika oras ne’e to’o iha Timor-Leste tamba taxa imunizasaun ba sarampo nian menus.

            “Ha’u rona aman barak mak lakoi fo nia oan ba vasina, tamba oan sira tanis nune’e barak lakoi haruka oan sira ba tuir programa imunizasaun”, ami agora halo mobilizasaun maka’as tama suku sai suku nune’e oinsa bele hasai ita nia rásio no sarampo bele atinji 90% nune’e bele reduz moras sarampo”, afirma Ministru Martins.

            Ministru Martins hatete moras TBC ho malaria la presija halo transferénsia ba raili’ur tamba médiku sira iha TL bele halo atendementu inklui kapasidade ONGV nian. “Ba ONGV, entermós jestaun kualidade asistensia di’ak ba bebeik, no iha 2011 MS implementa rezolusaun Governu foun ne’ebé fo ona mandatu no kompeténsia tomak ba ONGV atu deside pasiente ne’ebé mak presija halo transferénsia liuhusi Junta Médiku Nasionál”, dehan Ministru Martins.**

Ministru Martins Hala’o Enkontru Jerál Ho Pesoal Saúde no Analista TB Husi 13 Distritu

Ministru Saúde Martins hala’o enkontru jerál ho Pesoál Saúde Tubercoluze no Analista husi distritu 13 iha Institutu Ciensia da Saúde (ICS), hodi haree problema ne’ebé durante hetan iha Implementasaun programa kombate TBC.

Iha loron 22 Marsu 2011 Ministru Martins halo enkontru ho pesoál saúde no analista TB husu 13 hodi haree problema ne’ebé Infrenta durante implementasaun programa TB iha Distritu to’o iha suku ne’e. Iha enkontru ne’e Ministru Martins bá Partisipante sira katak, hakarak hahú fali modelu ne’ebé TBC pratika bele aplika bá programa sel-seluk.

“Enkontru jerál hanesan ne’e sempre halo reuniaun tinan ida dala rua, mais ikus mai la realiza fali.  Tamba ne’e komesa agora kada tinan tenke halo reuniaun ne’e dala rua kada fulan neen dala ida hodi diskuti problema ne’ebé mak infreta iha terrenu”, esklarese MInistru Martins.

Difikuldade maka’as liu tempu agora ne’e, wainhira loke programa ne’e iha Timor Leste tinan 1998. Maski nune’e iha tinan 2000 komesa lansa ona Programa Nasional TBC, maski Organizasaun Nasoens Unidas (ONU) seidauk estabelese UNTAET, no Governu Timor Leste seidauk iha.

Maski nune’e iha peritus barak ne’ebé dehan katak, wainhira seidauk iha nasaun ida seidauk bele lansa programa nasional ne’ebé hetan suporta husi Organizaun Saúde Mundial, Nort  and Teritori, no organizasaun internasional sira seluk ne’ebé ajuda Timor Leste hodi lansa programa refere.

Nune’e programa nasional TB ne’e, wainhira husi Caritas entrega bá Governu Iha tinan 2006, iha momentu ne’ebá Iha ema ne’ebé ituan deit no husi ne’ebá ema nain hira mak brani foti desizaun husi hela Caritas tama iha Governu hodi kontinua programa ne’e iha Governu.

  Alen ne’e Iha tinan 2009 Timor Leste atinzi tarzetu WHO ne’ebé hetan 70% kesfunding, kuras 85%, maibe problema sei nafatin. Maski Kesfunding ne’e sae tamba programa SISCa, tamba desde tinan 10 husi 1995 to’o iha 2008 Timor Leste la hetan. Kunadu lansa ona SISCa mak foin bele hetan keisfunding tun. Tamba ne’e  labele abandona meja 5 no tenki tun.

Timor Leste atinzi ona meta dezenvolvimentu MIlenium iha TBC, konsege hatun metade, maski atinzi meta Dezenvolvimentu Mileniun, maibe tasa ne’e sei aas nafatin, tamba intensaun la’os atu atinzi tasa ne’ebé mak ema internasional sira tau, maibe ho intensaun liberta povu husi moras at sira ne’e.

Tamba ne’e tenke hamutu nafatin koiñese malu fó ajuda bá malu fahe esperensia bá malu no kontinua luta. Tamba dala barak difikuldade halo ema baruk, maibe haree bá pasiente sira hemu aimoruk fulan 3 bokur ituan mak kontenti.

Iha enkontru ne’e Ministru Martins bá Pesoal Saúde no Pesoal Analista TB katak, sei funu iha funu naruk ne’ebé kontinua hasoru, luta nafatin hodi elimina moras TB ne’ebé agora iha ne’e, tamba ne’e iha 2009 Timor Leste atinzi tarjetu saúde mundial nia ne’ebé 70% Keisfundin, 85% satesfeit.

Timor Leste kunadu deklara ona eliminasaun tubercoloze hanesan dadauk moras lepra ne’ebé Prezidenti Republika Dr. Jose Ramos Horta deklara eliminasaun moras lepra iha Timor Leste, ne’e sei diak maibe moras ne’e kontinua hanesan iha tempu funu gerileirus barak mak moras TBC no lori aimoruk tuir sira, no agora barak ne’ebé diak i balu sai ona membru Parlamentu, membru Governu balu mós nafatin iha forsa, maibe iha ne’e servisu nafatin kontinua.

Prosesu atu hetan eliminasaun moras TB ne’e Ministru Martins hatete, servisu ne’e presiza iha komitmentu bo’ot didikasaun makas no profesionalismu ne’ebé aas,

            Iha enkontru ne’e hetan partisipa husi 55 pesoál Saúde no Analista TB husi Distritu 13, no parseirus Ministeriu Saúde nian ne’ebé mak reprezentante husi KLIBUR Domin Tibar, husi CRC, nomos responsavel programa TB husi servisu sentrais MS ninian.

Iha enkontru ne’e haree problema no difikuldade ne’ebé Infrenta durante Implementasaun programa TB iha terenu ne’ebé to’o tinan 2011 ne’e. Maski nune’e iha mós diskusaun ne’ebé fó oportunidade bá Distritu ida-ida atu hato’o sira nia problema ne’ebé mak durante ne’e infrenta iha Implementasaun programa no mós iha solusaun saida mak presiza iha atu nune’ bele hadia implementasaun programa iha tempu oin mai.

Alienede ne’e husu mós bá Distritu sira ne’ebé mak iha atinzimentu diak durante 2010 ne’e no fahe esperensia kona-ba antinzimentu ne’ebé durante ne’e sira atinzi nune’e Distritu sira seluk ne’ebé atinzimentu ladun diak bele hetan informasaun no esperensia husi Distritu sira ne’ebé hetan ona atinzimentu.

Iha enkontru identifika problema rekursus umanus atu hala’o progma TB no pesoal saúde iha Sentru Saúde ida kaer programa 2-3, balu to’o 4. Maski nune’e falta mós pesoál analista laboratorium bá programa TB. Nune’e koñesimentu komunidade bá programa TB mos sei menus liu, tamba razaun hirak ne’e mak seidauk bele atinzi kobertura ne’ebé diak husi Distritu sira.**