“ National One Health Workshop”.

Husi Carinton Salazar G Freitas

Abertura Sorumutu National One Health Workshop Iha Otel Timor 14-02-17 Foto Carinton

Saudesemanal, Ministeriu saude servisu hamutuk ho ministeriu Agrikultura, Floresta e Pescas hetan apoiu tekniku husi Organizasaun Mundial Saude iha timor-leste hala’o sorumutu durante loron tolu iha Ótel Timor 14-16 fevereiru konaba “ National One Health Workshop”.

Sorumutu ida ne’e hetan partisipasaun masimu husi Diretor Geral Prestasaun servisu ministeriu saude em Exercicio Narcisio Fernandes, Reprejentante Organizasaun Mundial Saude iha Timor-Leste Rajes Pandev, Diretor Geral Pequaria MoAF Antonino do Carmo, Diretores Nasionais husi Ministeriu saude, Ministeriu Agrikultura Floresta e Peskas, Diretores Municipais, ONG nasional, no ONG internasional sira balun.

Rajes pandav iha ninia diskursu hateten “ iha tinan tolu nulu liuba moras foun sira mosu 75 % mosu husi animal, entaun ita nia meu ambiente importante loos. Ita nia meu ambiente bele hetan kontaminasaun, bele hetan polusaun, bele mos hetan moras foun nebe bele mosu”.

Rajes hatutan“atu hetan meu ambiente ne’ebé saudavel ita presija servisu hamutuk, ita presija kolaborasaun ne’ebé forte tamba animal durante ne’e ajuda ita maibe bele mos lori perigu ba ita”.

Hafoin abertura Diretor Geral Prestasaun Servisu Em Exercicio Narcisio Fernandes ba Jornalista akresenta katak “ Iha tinan tolu liuba ita nia nasaun mos amesadu husi moras sira hanesan ebola nomos moras sel-seluktan, agora dadaun mundu iha mudansa tiha ona, agora akotese katak moras barak mak hetan transmisaun husi animal ba ema”.

Tamba ne’e mak ministeriu saude servisu hamutuk ho ministeriu agrikultura halao sorumutu durante loron tolu nia laran ho objetivu atu diresaun rua ne’e bele hare hamutuk moras ne’ebé interligadu ho animal nian. Ministeriu saude hamutuk ministeriu agrikultura no peskas mos servisu hamutuk atu halo planu ne’ebé apropriadu hodi responde ba moras ne’ebé sei mosu wainhira hetan transmisaun husi animal.

Sorin seluk Antonino do Carmo Diretor Geral Pekuaria Ministeriu Agrikultura, Floresta e Peskas Realsa katak “ ita hotu hatene katak kuaze 75 pursentu moras iha mundu mai husi zoonotiku signifika hadaet husi animal ba ema. Hatan pergunta konaba durante ne’e hetan ona moras balun ne’ebé detekta husi animal sira ne’ebé importa mai husi rai le’ur “ Felismente ita seidauk detekta moras ne’ebé mai husi animal ne’ebé tama mai iha rai laran”.

Hein katak sorumutu ida ne’ebé estabelese ne’e bele realiza ho susesu no bele hetan planu ne’ebé apropriadu hodi responde ba neseidades ema ho animal nian iha fututuru MS-101