 |
| Rai sira membru ba CPLP |
Ministériu Saúde prepara dadaun atu simu mós Simeira Xefe Estadu CPLP ba dahuluk iha Timor-Leste. Preparasaun enkontru nível aas husi Xefe Estadu rai sira ho dalen portuges ne´ebé sei hala´o iha Timor-Leste iha fulan Jullu 2014 ne´e exiji prontidaun servisu husi Ministériu Saúde tomak. Ekipa sira ne´ebé sei envolve iha preparasaun ida ne´e mak hanesan servisu emerjénsia, servisu ambulánsia, Sentru Saúde (SS) sira, Ospitál Nasionál Guido Valadares (ONGV) no Departamentu Saúde Ambientál.
Dispozisaun servisu sira ne´e mak hanesan ambulánsia standby oras 24 hodi fó asisténsia ba kada delegasaun husi rai hotu hotu be sei prezente iha Simeira ida ne´e. Ekipa médiku iha ONGV sei destaka espesialmete ba Simeria iha kada oras, hodi prepara mós kuartu haat ba VIP, no ba SS sira hanesan SS Formosa, SS Comoro, SS Vera Cruz no mós SS Becora sei iha disponibilidade atu simu VIP sira be moras ho atendimentu médiku durante oras 24. Bainhira akontese eventu boot sira ne´ebé hanesan ida ne´e, Ministériu konsidera nu´udar imprensindível, hodi nune’e estabelese unidade médika ida ba servisu hamutuk ho Ministériu Negosiu Estrageirus hodi fo apoiu ba kazu urjente hotu hotu.
Ba Departamentu Saúde Ambientál sei hahu kedaas husi fulan Juñu 2014,
ba halo vijilánsia
sanitária. Vijilánsia sanitária ne´e katak sira sei halo fumigasaun,
limpeza jerál, inspesaun sanitária iha estabelesimentu públiku sira
hanesan aeroportu nasional Nicolau
Lobato, Palásiu Prezidensiál , Palásiu Nobre Lahane, Palásiu Governu, no
mós Edifísiu Parlamentu Nasionál, Ministériu Negosiu Estranjeiru,
Sentru Konvensaun Dili, Ospitál Nasionál Guido Valadares, Laboratóriu
Nasionál, Sentru Saúde Comoro, Vila Verde, Formoza, Otel Dili Beah, Otel
Timor, Otel The Ramelau, Otel Turismu no mós merkadu Lahane.
Ministériu Saúde sei la halo deit kontrolu ba Otel maibé ba mós
restaurante sira ne´ebé sei hahu kedas husi fulan Maiu ne´e. Ba
restaurante sira ne´e hanesan atividade baebaen ida bainhira ekipa
Ministériu Saúde sei halo
inspensaun prazu ba ai-han no bebida nia validade, no mos oinsa otel no
restaurante sira konserva
sira nia produtu bainhira sosa, nune´e mos ho kondisaun ijiene no
seguransa iha
servisu fatin.
Diresaun Nasionál Saúde Públika agora dadaun prepara hela folletu
informativu kona-ba perfil
saúde iha Timor-Leste ba ita nia bainaka sira. Perfil Saúde ida ne´e sei
koalia badak kona-ba kondisaun atuál saúde iha rai-laran tomak hanesan
estabelesimentu saúde sira iha teritóriu tomak, moras saida deit mak
sira tenki iha atensaun ba, servisu ida ne´ebé mak diak no mós ida
ne´ebé mak sei presiza hadian ba sai diak liu tan.Liu husi Simeira ida ne´e Ministériu Saúde ninia ekipa tomak sei hakaas aan atu bele fornese servisu saúde ida ke diak liu tan no adekuadu ba bainaka sira.
