Diretór Jerál no Prezidente Konsellu Administrasaun SAMES, dr.Domingos Alves hatete, MS liuhusi Serviços Autónomos de Medicamentos e Equipamentos da Saúde (SAMES) iha komitmentu boot atu hadi’a kondisaun aimoruk. Nune’e SAMES tinan ne’e hola tan kareta 5 ba distribuisaun aimoruk ba iha ospitál Timor laran tomak. DJ Alves kasu lia hirak ne’e iha nia servisu fatin SAMES Kampung Alor.
DJ Alves husu ba staff SAMES rasik atu servisu maka’as liutan, sukat orsamentu estadu no kapasidade SAMES rasik. Tuir DJ Alves kapasidade orsamentál Governu ba SAMES seidauk ideál, maibe halo ona esforsu.
“Ami SAMES agora iha tan kareta foun 5, tolu ho marka KIJANG no Kamioneta ida no ANGUNA ida atu apoia halo distribuisaun aimoruk iha teritóriu laran tomak. Ba kareta rua seluk hala’o servisu distribuisaun Oxijéniu iha nivel distritál to’o iha sub-distritál”, informa DJ Alves.
Esforsu SAMES konsiste iha hola kareta foun inklui garajen, hariii uma ba DJ, halo extensaun área SAMES husi oin no kotuk.
Iha tinan 2009 SAMES hetan orsamentu U$ 2,4 Milloens no iha 2010 sa’e ba 3,4 Miloens nune’e iha aumentu 10%, maski seidauk ideal tanba presija orsamentu ba fornesimentu aimoruk ho totál U$ 5,5 Milloens.
Iha parte seluk Xefe Departamentu Farmasia MS, António Ximenes hatete katak sistema distribuisaun aimoruk ba iha ospitál referál 5 inklui ONGV suplay fulan ida dala ida, maibe ba distritu fulan 3 dala ida, nune’e mós suplay pedidu rekijasaun regular ho extra inklui emerjénsia ba hotu-hotu. Sistema suplay tuir polítika aimoruk nasionál atu garantia no asegura aimoruk hotu-hotu inklui aimoruk vital, esensial no non esensial. Husi aimoruk oin tolu mak aimoruk vital hanesan aimoruk narkotik sukatropiku no aimoruk kanker. Aimoruk esensial hanesan paracetamol, amoxicline, vitamin, cotrimoxazole, oralit. non esensial mak hanesan aimoruk nesesita tuir nesesidade ne’ebé mak iha.
Xefe Ximenes informa totál aimoruk iha lista esensial daklis 306 item, maibe ba ospitál ida 260 item, ba postu saude 102 item, ba sentru saude 163 item, no ba ospitál sira 260 resin item. Nune’e aimoruk nia kategoria hanesan maibe iha aimoruk balun labele provide iha postu saude. Tamba ne’e aimoruk iha postu sanitaria tenki iha oralit, paracetamol, amoxicline, SF no sira seluk. Aimoruk balu ne’ebé labele fornese ba postu sanitáriu mak diazepam, norsetriakson tanba aimoruk refere ba deit ospitál no sentru saude interna. Nia garantia katak stok aimoruk sufisiente ba ospitál, sentru no postu saude hotu.
Xefi Ximenes haktuir katak fornesimentu aimoruk hirak ne’e sosa husi nasaun ne’ebé deferente hanesan ESKO INDIA, MULTIKEN NEWZELAND, GUNUNG MAS INDONESIA, BUY BNR AUSTRALIA. Nune’e departamentu Farmasia MS servisu hamutuk ho SAMES iha parte kompras to’o suplay aimoruk ba fasilidade saude sira.
“Durante ne’e SAMES seidauk 100% iha kapitalizasaun maibe sei iha faze preparasaun ba kapitalizasaun. Nune’e seidauk bolu BUMN Full (empreza públika) maibe bele dehan 80% sai ona empreza públika, nune’e 20% sira depende ba MS maibe dadaun ne’e sira iha fase atu ba BUMN 100% iha tinan oin”, informa xefe Ximenes.
MS liuhusi Departamentu Farmasia ho SAMES hamutuk halo planu tenderizasaun ba kompras aimoruk kada tinan inklui kompras, knar SAMES mak distribui aimoruk ba fasilidade saude teritóriu tomak ne’ebé hetan apoiu orsamentu husi Departamentu Farmasia.**
No comments:
Post a Comment