VENSEDOR BA LOMBA DISKURSU ENTRE ESKOLA PRIMARIA SAME”.

Naran : Sonia Da Conceicao Verdial
Data Moris : 30 Junhu 1999
Escola EP Fatuco
Classe 6o

“PARTISIPASAUN LABARIK BA DEZINVOLVIMENTU NASIONAL”

Sua Exelensia Ministru saude RDTL
Exelentismu Administrador Distritu Manufahi
Exelentismu lideres Komunitaria
Exelentismu Reprezentante NGO Lokal no Internasional
Exelentismu Komandante PNTL Distritu Manufahi
Hau Nia Respeita No Hakuak Boot Ba Maluk Sira Hotu

Uluk nanain hanesan kriatura la haluha hato’o ita nia agradesimentu ba Aman maromak ne’ebé ho nia tulun no grasa mak momentu ne ne’e hau bele hamrik iha ita boot sira hotu nia oin hodi hato’o hau nia diskursu ho tema “ Partisipasaun labarik ba dezinvolvimentu nasional” hodi prense aktividades ba selebrasaun loron independensia ne’ebé halao iha loron ohin 20 Maiu 2011
Nudar labarik, Ita mak future nasaun doben ida ne’e. Ema matenek barak, No ulun nain sira sempre hateten katak Joven mak future, Maibe ida ne’e la duun loos, Tamba tuir hau nia hanoin joven sira ne’e mak prezente no ami labarik mak future. Nudar future nasaun ida, Husu to’ok ba ita nia aan saida mak ita presiza no prepara ba rai doben ida ne’e.

Maluk Partisipantes Sira Mak Hau Respeita No Hadomi

Naha todan ida mak agora Ita atu tula iha ita nia kabas, Hodi lori nasaun ida ne’e ba oin. Ita hotu nudar labarik tenki tau iha ita ida-idak nia hanoin no konsiensia tomak katak ita hotu tenki badinas ba eskola, partisipa aktivu iha aula, Envolve aan iha aktividade oi-oin ne’ebé halao iha eskola nomos komunidade tamba prosesu aprendizazem la to’o de’it iha aula eskola maibe bele aprende liu husi eventu balun hanesan loron ida ohin, Hakbesik aan ba iha movimentus sira ne’ebé organizadu, Buka tuir hodi hatene katak husi prozetu barak ne’ebé hala’o iha ita nia rain, Pursentu hira mak aloka ba ita nudar labarik, Azensia no LNGO( Local non Governmental ) ida ne’ebé mak servisu iha area labarik nian, Sira halo saida no nia rejultadu iha ne’ebé? Se ita nudar labarik mehi ba pontus iha leten no halo ida ne’e, Mak sei forma rasik ita, Iha future. Hau rasik hakarak fo korazem ba ita labarik lubun oan ida ne’e katak” saida mak ita sente bele halo, Hahu buat ne’e, Tamba, Ita la’os destinadu maibe ita kria rasik ita nia destinu liu husi hanoin no asaun”.

Maluk Sira Hotu Mak Hau Respeita

Buat barak ne’ebé hau temi ona iha paragrafu leten, Se ita tau iha asaun konkreta, Ne’e mak onra boot tebes mak sei tulun ita hodi hatudu dalan no lori ita ba hetan dalan sira ne’e nia ninin no rohan.
Mak ne’e deit liafuan husi hau, Ba imi hotu ne’ebé rona diskursu ne’e. Karik la monu ba ita boot sira nia laran, Nudar ema ida bai-bain la haluha hau husu deskulpa antes hau hases aan husi ita boot sira nia oin, No agradese barak ba imi hotu nia atensaun hodi rona liafuan folin laek ida ne’e.
Obrigada